Жамауат

РФ-ни Пенсия фондундан (ПФ) билдиргенлерине кёре, жангы жылдан ана капиталны ёлчеми 3,7% кётюрюлгенди. Аны бла сертификатны алгъан 4,3 миллион юйюр хайырланнгандыла.  Ахча юйде къаллай бир сабий болгъаны эм аланы туугъан заманларына кёре тёленеди.

Биринчи сабийге капитал 17,3 минг сомгъа кёбейтилип, быйылдан башлап 483 882 сом болгъанды. Аллай бир ахча эки сабии болгъан юйюрге да бериледи, бала 2020 жылгъа дери туугъан эсе эм ата-ана эндиге дери сертификатны алмагъан эселе.

Тютюн адамны саулугъуна салгъан заранны юсюнден алимле, медикле кёп кере айтхандыла. Алай, нек эсе да, орамлада, кафеледе, машиналарында, ишчи жерлеринде, юйлеринде аны тартханла азаймайдыла. Тютюнчюлени арасында эр кишиле угъай, тиширыула, акъылбалыкъ болмагъанла окъуна бардыла. 

Никотинни хатасындан башланнган аурууладан жылгъа дуния башында бек аздан беш миллион адам ёледи. Саулукъ сакълауну халкъла аралы организациясыны тинтиулерине кёре, жууукъ кезиуде бу тарихле бютюнда ёсерикдиле. 

Черек районда Малкъар халкъны къыраллыгъы къайтарылгъан кюнню жарыкъ халда белгилегендиле. Байрам Къашхатауда политика репрессияла сынап жоюлгъанланы эсгертмесине гюлле салыудан башланнганды. Ызы бла автопробег къуралгъанды. Анга къытышханланы араларында жерлешлерибиз эм къоншу республикадан келечиле болгъандыла. Байрамгъа энчи къууатны уа атла бла тизилишип барыу бергенин белгилейдиле Черек районну жер-жерли администрациясыны пресс-службасында.

28 март хар таулу адамны жюрегинде энчи жерни алады, огъурлу, намысына къаты миллетни келечиси болгъанына ёхтемлендиреди. Аны уллу тарых, аны бла бирге уа юйретиу магъанасы барды – ол бизни, жаш адамланы, ата-бабаларыбызны ахшы юлгюлеринде жашаргъа юйретеди. Ала уа, ачлыкъгъа, зорлукъгъа къарамай, киши жеринде баш тута билгендиле, иш кёллюлюклери, адамлыкъгъа сакълыкълары бла атларын айтдыргъандыла.

Къабарты-Малкъарда биринчи къырал эм муниципал жумушланы тамамлагъан кёп функциялы ара (МФЦ)  ишлеп башлагъанлы  тогъуз жыл болады. Андан бери аны   онеки бёлюмю  ачылгъанды.  Бюгюнлюкде  алада   600 артыкъ специалист урунады,  ол санда саулукъларында бир тюрлю кемчиликлери болгъан  33 инсан.  Андан сора да, 116 элде 147 специалист къармашады.  Предпринимательлеге себепликге    «МФЦ для бизнеса»,   «Россельхозбанк» эм «Банк Нальчик» учреждениялада да къошакъ халда  болушлукъ берген офисле бардыла.    Саулай алып айтханда,    401 «терезеде» жамауатны 340 аслам къырал эм муниципал  жумушларын   тамамларча онг къуралгъанды.  

Келир жыл тапландырыллыкъ жамауат тийрелени айырыу жаны бла битеуроссей къол кётюрюуге бизни республика да къатышырыкъды. КъМР-ни Экономиканы айнытыу министерствосундан билдиргенлерине кёре, бу иш быйыл 26 апрельден башлап, 30 майгъа дери  www.za.gorodsreda.ru платформада онлайн халда бардырыллыкъды. Барындан да кёп къайсы муниципалитетле ючюн къол кётюрюлсе, ахча алагъа берилликди.

Бу кюнледе Къабарты-Малкъарда битеукъырал «Сириус – 2021» космос конкурсну «Дежурный по планете» деген ахыр кесеги бардырылгъанды.

Эришиу бизде фахмулу сабийлени ачыкълагъан эм аланы айнытыугъа себеплик этген «Антарес» ара 2020 жылны декабринде битеуроссей конкурсда хорлагъаныны хайырындан къуралгъанды.

Жыл сайын Россейде хунерли педагогланы баямлаугъа, аланы социал даражаларын кётюрюуге эмда къыйнларын ачыкълаугъа жораланнган конкурс  бардырылыучуду. Бу кюнледе аны муниципал уруму  озгъанды. Аллай эришиу Элбрус районда да къуралгъанын бизге аны пресс-службасындан билдиргендиле. Жыйылыугъа сагъынылгъан районну администрациясыны башчысы Залийханланы Къаншаубий, аны биринчи орунбасары Арслан Улимбашев, билим бериу управленияны таматасы Атаккуланы Нюржан, бешинчи номерли гимназияны (Тырныаууз шахар) директору Моллаланы Фатима,  эл администрацияны келечилери да къатышхандыла.

Бу уллу эм башхалагъа ушамагъан жаныуарла Африкада, Юг эм Юго-Восток Азияда жашайдыла. Быланы бек сейир этерча затлары - мюйюзлеридиле. Африкалы мюйюзбурунланы тюз да башында бир уллу мюйюзю, аны артында да гитче мюйюзю боладыла. Кеслери да тереклери аз болгъан, кенг аулакъланы сюедиле. Азиялы мюйюзбурунну уа бирер мюйюзлери болады. Бу жаныуарланы бурун мюйюзлери бир-бирде 1,5 метрге жетедиле. Гумхотлары эртте заманлада жер башын бийлеп тургъан динозаврланы гумхотларына бек ушайдыла. Бурун мюйюзлери уа жыртхыч жаныуарладан къорууланыргъа аламат сауутлукъ этедиле.

Республикада эл мюлк жерлени бир талайы арендагъа бериледи, деп билдиредиле Къабарты-Малкъарны Жер эмда ырысхы бла байламлы халланы министерствосундан. КъМР-ни Башчысыны буйругъу бла бу иш бла байламлы битеу шартла ачыкъ болургъа керекди да, участкаланы тизмеси жарашдырылып, басмада кёргюзтюледи.