Жууаплы усталыкъ

Жыл сайын 19 майда Россейде фармацевтни кюню белгиленеди. Ол РФ-ни Правительствосуну 736-чы номерли бегими бла 2021 жылда 15 майда къуралгъанды. Аны башламчылыгъы уа Битеуроссей халкъ фронтдан чыкъгъанды. Къыралны айнытыуда, халкъыбызны саулугъун сакълауда фармацевтика бёлюмде уруннганланы ишлери магъаналы болгъанын чертип, алагъа байрам къураргъа кереклисини оноуу ма анда этилгенди. Фармацевт ишчилени битеуроссей съездинде уа аны дурус кёргендиле.

Бу кюн 19 майгъа тохташдырылгъаны да бошуна тюйюлдю: къыралда биринчи аптека Иван Грозный патчахны заманларында 1581 жылда 19 майда ачылгъан эди. Анда къуру дарманланы сатыу бла угъай, аланы жарашдырыу бла да кюрешип тургъандыла.

Баш къырал аптекагъа (ол кезиуде аны аты алай эди) специалистлени тыш къыралладан окъуна чакъырып болгъандыла. Закон халда дарман сатыу эмда этиу жерге жаланда ол саналгъанды. Биринчи заманлада ол жаланда патчахха эмда аны юйюрюне ишлеп тургъанды. Алай артда, власть Романланы атауулгъа кёчгенден сора, анга патчахны юйюрюне жууукъ бай-бийле да эркинлик алгъандыла. Алексей Романовну заманында уа, 1672 жылда, Москвада Тёбен аптека ачылады. Ары башха адамла да барыргъа боллукъ эдиле.

Аптекаланы айнытыуда экинчи атламны Пётр Биринчи этгенди. Аны буйругъу бла иели аптекала ачылып башлайдыла, аладан башха жерледе уа, бютюнда медицинадан ангылаулары болмагъан адамлагъа, дарман сатаргъа чек салынады. Аз кечирег а - 1789 жылда, биринчи Аптекарь устав да басмаланады.

Совет Союзну заманларында аптекала бары да къыралны иелигине кёчюрюледиле. Алада сатыугъа уа бек къаты контроль этип башлайдыла. Къырал чачылгъандан сора энчи аптекала къураладыла, дарманланы да къадар тюрлюлери чыгъадыла. Аны себепли фармацевтни иши бютюнда магъаналы болады. Бюгюнлюкде, импортну алышындырыу болумда, фармацевтика баш магъаналы бёлюмледен бирине саналады.

Кёп жылланы ичинде фармацевтле кеслерини байрамларын Медицина ишчини кюнюнде белгилеп тургъандыла. Энди уа  провизорланы, фармацевтлени, аптекаланы башха ишчилерини, дагъыда дарманла жарашдырыучу эмда чыгъарыучу лабораторияланы эмда предприятияланы специалистлерини энчи байрамлары барды.

Улбашланы Мурат хазырлагъанды.
Поделиться: