Жалгъан ичгини жашырын ташыгъанды

Республиканы инсаны 40 тонна спиртни законсуз ташыгъаны ючюн тутулгъанды.

КъМР-де МВД-ны кеси къоркъуусузлугъуну бёлюмюню полициячылары, Терк районда ОМВД-ны къуллукъчулары бла бирге излеу-тинтиу жумушланы бардыргъан кезиуде этил спиртни законсуз ташыгъан инсанны ачыкълагъандыла. Прохладный-Эльхотово жолну 39-чу километринде полициячыла, алагъа белгили этилген билдириуню тинтир мурат бла, цистернасы бла ауур жюклю машинаны тохтатхандыла. Аны водители 59-жыллыкъ нартанчыды.

Машинаны тинтген кезиуде цистернада жашырын жер къуралгъанын, аны ичинде уа суусун зат болгъанын ачыкълагъандыла. Водитель элтген жюкге бир тюрлю документни кёргюзталмагъанды. Ол айтханыча, аны къоншу регионда белгисиз адамдан сатып алгъанды. 

Тинтиуледен тохташдырылгъаныча, жашырын жерде суусун зат ГОСТ-ха келишген этил спиртди, аны ауурлугъу 40 тоннадан асламды. Жалгъан продукцияны багъасы 2,6 миллион сомдан озгъанды. 

Полициячыла эр кишиге РФ-ни УК-сыны 171.3-чю статьясыны 2-чи кесегини «б» пунктуна бузукълукъ этгени ючюн терслеу материалла ачхандыла. 
 

 

Тикаланы Фатима хазырлагъанды.
Поделиться: