Росгвардиячыла патриот акциягъа къатышхандыла

Росгвардияны Бахсан районда ведомстводан тышында охранасыны къуллукъчулары Уллу Хорламгъа аталгъан аскер-патриот автопробегге къатышхандыла. Автопробегни жолу Къабарты-Малкъарны битеу шахарлары эм районлары бла, къазауат баргъан жерле бла ётгенди.    

Бахсан шахарда ётген митингде Росгвардияны, районну администрациясыны, аскер-патриот организацияны келечилери эм ветеранла бла школчула къатышхандыла. Байрамгъа келгенле барысы да, жанларын берип, Ата журтну къоруулагъан аскерчилерибизни эсгергендиле. Ала эсгертмеге гюлле салып, аланы хурметлерине бир минут шош тургъандыла.

- Хорламны кюню энчи байрамды. Ол бизни бойсундурургъа, жер башындан бла тарыхдан жокъ этерге кюрешген душманны ууатыуду. Алай аны ючюн къаллай багъа тёленнгенди – аталарыбыз, аппаларыбыз журтубузну азатлыгъы ючюн жанларын-къанларын аямагъандыла. Бизни сыйлы борчубуз а аланы эсде тутуп, ёсе келген тёлюлеге жигитлерибизни юсюнден билдириудю, - дегенди Росгвардияны келечиси полицияны капитаны Азамат Газиров.