Эки мингден артыкъ уула бла чулгъам сыйыргъандыла

МВД-ны КъМР-де наркотиклени законсуз сатыу-алыугъа къажау бёлюмю оператив-излеу ишлени кезиуюнде ФСБ-ны КъМР-де управлениясыны къуллукъчулары бла бирге эм «Гром» энчи организацияны болушлугъу бла Прохладна районда Прималкинский элни къатында агъачда, уулу зат букъдура тургъанлай, бир эр кишини тутхандыла. Алайдан полициячыла бастырылып тургъан 296 хуржунну къазып чыгъаргъандыла. 

18-жыллыкъ жаш ангылатханыча, хуржунланы ичинде наркотикледиле, аны биргесине жашагъан 19-жыллыкъ къыз бла бирге республикада ууланы  жаяр умутлары бар эди.

Тинтиулени кезиуюнде полициячыла Прохладна шахарны тийресинде энтта да беш уула букъдурулгъан жерле табып, аладан 1688 хуржун чыгъаргъандыла.

Законсуз сатыу-алыудан битеу да 2775 хуржун сыйырылгъанды. Экспертлени эсеплерине кёре, алада 1,2 килограмм героин бла 300 грамм чакълы «Метадон» болгъаны ачыкъланнганды.

МВД-ны Прохладна районда следствие бёлюмю аманлыкъчылагъа РФ-ни УК-сыны 228.1-чи статьясыны 4-5-чи кесеклерине тийишлиликде (Интернет бла хайырланып уллу ёлчемде наркотиклени сатар мурат) терслеу иш ачханды.

Шёндю аманлыкъчыланы эркинликлери сыйырылыпды, деп билдиредиле КъМР-де МВД-ны пресс-службасындан.