Тюкенчилени алдатыргъа кюрешгенди

Къабарты-Малкъарда сюдге Урвань райондан 23-жыллыкъ жашны юсю бла ачылгъан уголовный иш сюдге жиберилгенди. МВД-ны Урван районда бёлюмюнде алгъада да сюд этилген  23-жыллыкъ жашны юсю бла бардырылгъан тинтиуле бошалгъандыла.

Хыйлачылыкъ ишлени аманлыкъчы Нарткъала шахарда этгенди. Юч сагъатны ичинде алдап, ол юч сатыу-алыу баргъан жерден абериле урлагъанды. Ол, юйге керекли затла сатылгъан  тюкеннге келип, 6 минг сом тургъан  электроинструментни сайлагъанды. Кассирге жалгъан чек кёргюзтюп, инструментни багъасын тёлегенча этгенди. Жалгъан чекни уа ол интернет бла хайырланып, социал сетьлени биринде этгенди.  Тюкенни ишчилери анга къагъыт чек бергенден сора, жаш товар бла чыгъып кетгенди. Бир къауум замандан, ол артха къайтып, инструмент анга керек болмагъанды деп, аны багъасын артха алыр умут этгенди. Тюкенчиле жангыдан чекни кёргюзт  дегенде, аманлыкъчы инструментни да анда атып къачханды.

Кесини хыйлачы ишлеринде 23-жыллыкъ жаш энтта да алай эки тюкенни алдатханды.

Ол кюнню ингиринде тюкенчиле ахчаны санагъанда, аланы хыйлачы алдагъанын ангылагъандыла.

Оператив-излеу ишлени кезиуюнде Урван районда уголов-излеуню къуллукъчулары аманлыкъчыны ким болгъанын тохташдырып тутхандыла. Ол аманлыкъчыланы этгенин билдирип, ахчаны артха къайтаргъанды. Жашны юсю бла РФ-ни УК-сыны 159 статьясына тийишлиликде уголов иш ачылгъанды.