Усталыгъын дайым ёсдюргенлей турады

Адамланы эм жерлени къыйын болумланы хатасындан къоруулаугъа, бийик таулада ачыгъанланы къутхарыугъа салгъан къыйыны, кёп жылланы бет жарыкълы ишлегени ючюн республиканы Башчысыны оноуу бла МЧС-ни Элбрус бийик тау излеу-къутхарыу отрядыны таматасы Алексей Бондарьгъа «Къабарты-Малкъарны сыйлы къутхарыучусу» деген ат берилгенди.

Алексей Бондарь Кемеров областьны Новокузнецк шахарында туугъанды, кёп жыл мындан алгъа аны юйюрю Тырныауузгъа кёчгенди, анда ол 6-чы номерли мектепде окъугъанды. Урунууну уа алгъа жолла, ызы бла уа къурулуш жаны бла башлагъанды. Жыйырма жыл а мындан алгъа, 2003 жылда, МЧС-ни Элбрус бийик тау излеу-къутхарыу отрядына киргенди. Усталыкъны энчиликлерине тюшюне, ол биринчи класслы къутхарыучу болгъанды, коллективинде аны юсюнден ишин билген, огъурлу адамныча багъалайдыла. Эм къыйын болумлада тюрлю-тюрлю къутхарыу операцияланы бардырырча аны талай усталыгъы да барды: ол курт юзюлгенде, суулада ишлеялады, тау-лыжала, десант, промышленный альпинизм жаны бла билим алгъанды.

Отрядда ишлеген кезиуюнде Бондарь 400-ден аслам къутхарыу операциягъа къатышханды, ол санда Зольский, Черек, Элбрус районлада, Ставрополь крайда да. Табийгъат эм техноген къыйын болумланы хаталарындан адамланы бла мюлклени сакълаугъа, республикада эм андан тышында бийик таулада бла къаялада альпинистлени излеуге къошумчулукъ этгенди

Бир кере Минги таугъа ёрлегенде хауагъа юйренирча 3900-4000 метр бийикликде,  Онбиреуленни ышыгъында, боранны хатасындан зат кёрюнмей, альпинистлени къауумуну башчысы чыранда тешикге кетгенди. Алексей эм башха къутхарыучула аны, 40 метрлик тешикден чыгъарып, таудан энишге тюшюргендиле.

Андан сора уа Белгороддан альпинист кеси аллына Минги таугъа чыгъаргъа атланнганды. Кюнню халы уа болмагъанча аман эди, сууукълукъ 40 градусха жетгенди. Ол, Пастуховну къаяларыны башында чыранда учхалап тешикге кетгенди, башын бла аякъларын ачытханды. Быллай халлада Бондарьны башчылыгъында къауум, ол жыгъылгъан жерге жетгенди, анга биринчи болушллукъну этип, Азау талагъа келтиргенди. 2021 жылны сентябринде Элбрусда 5400 метр бийикликде 19 адамдан къуралгъан къауум къыйын хауа болумлагъа тюшгенди. Къутхарыучула алагъа болушлукъгъа атланнгандыла, кече болгъаны, сууукълукъ, боран да алагъа себеп тюйюл эдиле. Жашауларына къоркъуу болгъанына къарамай, къутхарыучула альпинистлени сакълар ючюн битеу кючлерин салгъандыла, аланы жашауларын сакълагъандыла.

Битеу бу сынамына, билимине да Алексей Бондарь жаш къутхарыучуланы юйретирге кюрешеди, аланы курт юзюлгенде, тау, тау  лыжа эм къаялагъа ёрлеуде дерсле береди.

Кульчаланы Зульфия хазырлагъанды.
Поделиться: