Жаш инспекторланы къауумуна къошулгъанды

Чегем районда Лячинкъая элни 2-чи номерли орта школунда биринчи классда окъугъан школчуланы байрам халда жаш инспекторланы (ЮИД) къауумуна алгъандыла.

Сабийлени алгъышларгъа Чегем муниципал районну администрациясыны башчысыны орунбасары, билим бериу управленияны башчысы Жанна Арипшева, МВД-ны Чегем районда бёлюмюню  къырал автоинспекциясыны жолда жюрюуню къоркъуусузлугъун ангылатыу жаны бла инспектору, полицияны подполковниги Алим Масков, «ДОСААФ-ны» Чегем районда бёлюмюню келечиси Аслан Шогенцуков келгендиле.

Школчуланы жаш инспекторлагъа алыу, алагъа жолда жюрюуню жорукъларын къайтарыудан башланнганды. Ишни кезиуюнде балала къонакъланы концерт кёргюзтюп къууандыргъандыла.

Окъуучула къонакъла берген жумушланы жетишимли толтургъандан сора, полициячыла алагъа, алгъышлау сёзле айтып, «ЮИД-чини» атын намысыгъыз бла жюрютюп, адамланы жолда низамлыкъгъа чакъырыгъыз деп, насийхат этгендиле.