Улутха бергени ючюн - жууапха

Республиканы 57-жыллыкъ инсаны право низамны сакълаучулагъа улутха берирге умут этгени ючюн жууапха тартыллыкъды.

Быйыл февральда бахсанчы эр кишини «Майский-Нальчик» трассада жол-патруль службаны къуллукъчулары тохтатхандыла. Ол къоркъуусуз бауну къысмай бара эди машинасында. Транспортну тинтген кезиуде, полициячыла ичгиси бла 20 ящик тапхандыла, шешалада къырал маркалары жокъ эди.

Водитель жалгъан ичгини ташыгъаны ючюн жууаплылыкъдан къачар мурат бла инспекторлагъа 5 минг сомну берирге умут этгенди. Полициячыла  ол бузукълукъ этгенин эсгертгенлерине да къарамай, ахчаны патруль машинада къояргъа умут этгенди. Болсада право низамны сакълаучула алайгъа следствие къауумну чакъыргъандыла. Ичги сыйырылып, экспертизагъа берилгенди.  Аны эсеплерине кёре праволу оноу чыгъарыллыкъды.

Водитель тутулгъанды. Анга РФ-ни УК-сыны 30-чу статьясыны 3-чю кесегине эм 291.2-чи статьясыны 1-чи кесегине кёре уголовный иш ачылгъанды. Материалла Май районну сюдюню къараууна берилгендиле. Дагъыда ишеклиге Административ бузукълукъланы кодексини 12.6-чы статьясына кёре иш да ачылгъанды.

Тикаланы Фатима хазырлагъанды.
Поделиться: