Жаш тёлю чыгъармачылыкъ къала ишленирикди

Кёп болмай Регионнга оноу этиу арада КъМР-ни жаш тёлюню ишлери жаны бла министри   Азамат Люев  бла  тюзюнлей эфир болгъанды.  Ол жангы тюрлениулени, бюгюнлюкде жамауатны жарсытхан  проблемаланы юсюнден хапарлагъанды эм тынгылаучуланы  сорууларына жууапла  бергенди. 

Азамат Хасейнович  айтханнга кёре,  быйыл республикада   жаш тёлю политиканы айнытыу жаны бла комплексли уллу иш бардырыллыкъды. Аны чеклеринде республикада юч жаш тёлю ара къураллыкъды - Нальчикде -1200 эм  Къашхатауда бла Урванда  550 квадрат метрден аслам уллулукълары болгъан мекямла  сюелтилинирикдиле. Саулай алып айтханда,  бюгюнлюкде ведомствону  баш борчларындан бири  жаш адамланы тюз жолгъа салырча онгла къураргъады.

- Быйыл Устазны бла насийхатчыны жылына аталгъанды эм алгъаракъда аны республикада къууанчлы  халда ачылыуу да  болгъанды.   Аны чеклеринде регионда элли комплексли проект бардырыллыкъды.  Планнга кёре, жаш адамлагъа башчылыкъ этерча, юйретирча  150 адамны хазырларыкъбыз.  Быллай магъаналы башламчылыкъгъа танг кесек жерлешибиз къатышыргъа керекди, аны ючюн къолубуздан келгенни аярыкъ тюйюлбюз. 

Аны бла бирге Нальчикде жаш тёлю чыгъармачылыкъ къала да ишленирикди. Ол 2024 жылгъа битерге керекди. Мында  хунерли жаш адамла кёп тюрлю  жаны бла кеслерин   ачыкъларгъа онг табарыкъдыла,- дейди министр.  

Ол  алгъаракъда « Юйретиучю» темагъа жоралап  министерство  соруу бардыргъанын да билдиргенди. Анга кёре   респондентлени  элли процент чакълысы къатларында   усталыкъ жаны бла юйретиучю болуруна бюсюрегендиле. Дагъыда жыйырма проценти билим бериу, дин эм адет-намыс жаны бла юйретселе тийишли кёргендиле. Алай бла чыгъарылгъан эсеплеге кёре, бусагъатда «Мен  юйретиучюме» деген проект бардырылады.   Аны чеклеринде  билимли, сынамлы инсанла жаш адамланы  юйретирикдиле.

Министр #Биз биргебиз деген битеуроссей акцияны   волонтёрларыны   ишини юсюнден да хапарлагъанды. Республикада аны штабы Жашил базарда орналады. Бусагъатда ол кёбюсюнде мобилизациягъа тюшгенлеге эм аланы юйюрлерине  болушлукъ тапдырады.  Бюгюнлюкде аны келечилерини тирнекликлерини эм жерлешлерибизни да уллу кёллю болмагъанларыны хайырындан  адрес халда  он тоннала бла гуманитар болушлукъ жиберилгенди.  Министр къаллай себепликни да артыкъ болмазын черте, жюн чындайла эшип келтирген абадан тиширыулагъа энчи  ыспас этгенди.

Тюзюнлей эфирни къонагъы  тынгылаучуланы сорууларына да жууап бергенди. Ала кёп тюрлю тематикагъа жораланнгандыла, ол санда «Движение первых» деген битеуроссей сабий эм жаш тёлю тебиулюкню, «КиберПатруль», «Точка взлета» дегенча регион проектлени ишлерини юсюнден да билирге сюйгенле болгъандыла. 

Бизни корр.
Поделиться: