Антларына кертичиликлери эмда жигитликлери бла да юлгюлюле

Шёндю бардырыла тургъан энчи аскер операциягъа кеслери ыразылыкълары, чакъырыу бла да кёп жашларыбыз къатышадыла. Ала, Ата журтну жалынчакъсызлыгъын къоруулауну сыйлы борчларына санап, антларына кертичиликлери эмда жигитликлери бла да юлгю кёргюзтедиле. Анга уа кёплери Россей Федерацияны Президентини Указы бла сыйлы  орденле эмда майдалла бла саугъаланнганлары шагъатлыкъ этеди. 

Бу кюнледе энтта да  бир ахшы хапар келгенди. Энчи аскер операциягъа къатышхан жерлешлерибизден бири – Аппайланы Арсенни жашы Рустам сыйлы къырал саугъагъа – Жуков атлы майдалгъа – тийишли болгъанды. Къыйын къазауатны кезиуюнде таулу жаш уллу батырлыкъ этгенди, къызыу сермеш бардыргъан солдатларыбызгъа топ-окъну жетдирип тургъанды.

Алгъаракълада билдиргенибизча, Къара-Суудан Атабийланы Мусрафильни жашы Магомет Жуков атлы даражалы майдал бла саугъаланнганды. Ол къуллукъ этген полкну аскер башчылары аны жууукъларына бла эллилерине аллай жашны ёсдюргенлери ючюн ыспас этип, къагъыт жазгъандыла.

Тёбен Чегемден Ёзденланы Музафарны жашы Залим бла Ёзденланы Керимни жашы Тамерлан да, республиканы атын иги бла айтдырып, халкъыбызны, эллилерин, жууукъларын да ёхтемлендиргендиле. Залим Жуков атлы майдалгъа, Тамерлан а Суворовну майдалына аскер борчларын бет жарыкълы толтургъанлары, низамлыкълары, ётгюрлюклери бла да башхалагъа юлгю кёргюзтгенлери ючюн тийишли болгъандыла. 

Бабугентден Каркаланы Исмайылны жашы Асланны жууукъларына да полкуну аскер башчыларындан ыразылыкъ къагъыт келгенди.  «Ол кишилигин,  бийик усталыгъы болгъанын, антына, аскерни ахшы тёрелерине кертичилей къалгъанын кёргюзтгенди…», – деп жазылады анда. Карка улу Суворовну майдалы бла саугъаланнганды.

Ата журтубузну жалынчакъсызлыгъы ючюн къалкъанча сюелген жигит жашларыбыз бла ёхтемленебиз, сау-саламат къайтырларын тежейбиз.