Школ таба баргъан жолну къоркъуусуз этерге керекди

Жолланы къайсылары да, эм биринчиден, адамгъа деп ишленедиле. Ала къоркъуусузлу, тап болургъа керекдиле - ол баямды. Школла таба баргъан жоллагъа уа бютюнда сакъ болургъа тийишлиди. Ма аны эсге алып, Битеуроссей халкъ фронтну (ОНФ) бизни республикада бёлюмюню келечилери, Нальчикде 32-чи номерли школ таба баргъан жолгъа эс бурургъа чакъырадыла.

Жамауатны келечилерин не зат жарсытады десегиз – анда тротуар тапсыз болгъанды. ОНФ-ге аны юсюнден сабийлени ата-аналары сёлешип билдиргендиле. Ала айтханларына кёре, ол жол эки жыл мындан алгъа жангыртылгъанды. Алай тротуар деген зат а анда энтта да жокъду. Аласыз а жаяу жюрюгенлеге, ол санда сабийлеге да, ол тийре къоркъуулуду.

Алайда кёп фатарлы юйлени жанындан къараса, жолну тротуары барды, алай ол а бегитилген жерге келтиреди. Анда пандус деген зат да жокъду. Аны хатасындан коляска неда велосипед бла ётерге къыйынды.

Бирси жанында уа гараж кооператив турады. Кеси да жол бла бир тюзде угъай, андан иги да энишгеде. Сабийле сюйселе, аланы башларына секирип тюшерге да боллукъдула. Гаражланы бийиклиги уа юч метрге жетеди. Сабий андан кетип жыгъылса уа не боллукъду?..

«Ма алай, биз рейд бардыргъанбыз, ата-аналаны айтханларын кеси кёзюбюз бла кёргенбиз. Керти да школчуланы ол жолда кёп къоркъуула тюбейдиле. Сёз ючюн, Киров атлы орамдан мектеп таба бурулгъан жерде къадар машина жюрюйдю. Алайда уа не жол белги, не адам бирси жанына ётерча деп жарашдырылгъан тийре жокъду. Биз аны юсюнден шахарны администрациясына письмо жазып билдиргенбиз, ол жерде бир мадар этигиз деп тилегенбиз», - дегенди ОНФ-ни регионда штабыны башчысы Евгений Бакаев.

 

Улбашланы Мурат хазырлагъанды.
Поделиться: