Керекли шартланы табаргъа тынч болурча

Сакъатлыкълары болгъан адамлагъа керекли билдириуле видео эм аудио интервью халда юйретиу продуктха жыйышдырылгъандыла. Бу ишде экспертлени жумушларын республиканы Урунуу эм социал къорууланыу, Саулукъ сакълау министерстволарыны, РФ-ни Социал страхование фондуну регионда бёлюмюню келечилери тамамлагъандыла.

Инфотекагъа экспертлени сакъатланы социал къоруулау, дарманла бла льгота халда жалчытыу, алагъа медицина болушлукъ этиу бла, ол санда 16 жыллары толмагъан сабийлеге да,  байламлы соруулагъа жууаплары киргендиле. Ол сокъур адамланы битеукъырал организацияларыны Къабарты-Малкъарда бёлюмлерини «Будь в курсе» проектини чегинде жарашдырылгъанды. Организацияны баш специалисти Черкесланы Юрий билдиргенича, проект сакъатлагъа керекли информация майданнга къураргъа, аны юсю бла аланы жашауларын женгиллендирирге болушурукъду.

Эсеплеге кёре, бусагъатда республикада 5 минг чакълы сокъур адам жашайдыла. Аланы кёбюсю тири жашау бардырыргъа кюрешедиле, бийик эм орта усталыкъ билим аладыла, социал-маданият эм жандауурлукъ ишлеге къошумчулукъ этедиле. Алай, ауруулары бла байламлы жамауатдан бир жанына турургъа тюшгени, бирде уа ахча жетишмегени ючюн жашауларында керекли информацияны алалмайдыла, сёз ючюн, къырал политика, льгота программала, дарманла эм реабилитация керекле бла жалчытыуну юсюнден билдириулени. Алай бла сокъурла видео эм аудиозаписьлеге интернет-сайтлада, социал сетьледе, интернет жокъ эсе уа, флеш-карталада тынгыларгъа боллукъдула. Толу курс https://disk.yandex.ru/d/XJBn5AZxfXkZeQ сайтда берилипди.

«Будь в курсе» проектни къураугъа ахча Къабарты-Малкъарны Миллетлени ишлери эм жамауат проектле жаны бла министерствосу бёлгенди, публикацияланы жыйышдырыуда эм аланы Интернетде салыуда болушлукъ «Коммерциялы болмагъан организацияланы проектлерин тамамлауну школу «Къабарты-Малкъарны огъурлу билдириулери» социал магъаналы проектни чегинде этилгенди, деп билдириледи республиканы Жамауат палатасыны сайтында.

Кульчаланы Зульфия.
Поделиться: