Сабийле участковыйлени суратлагъандыла

Къабарты-Малкъарда «Участковый сабийлени къарамлары бла» деген чыгъармачылыкъ конкурсда хорлагъанланы атлары  белгили болгъандыла.

Кеслерини ишлеринде, бояула бла,  карандашла бла, фломастерле бла хайырлана, сабийле полициячыланы суратлагъандыла.

Конкурсха республиканы тюрлю-тюрлю районларындан 30-гъа жууукъ сурат ашырылгъан эдиле.

Жюрини къауумуна МВД-ны КъМР-де жамауат къоркъуусузлукъну жалчытыу бёлюмюню башчысыны орунбасары полицияны полковниги Роберт Керефов эм ведомствону подразделенияларыны къуллукъчулары киргендиле.

Конкурс анга къатышханланы  жыл санларына кёре къауумлагъа юлешинип бардырылгъанды: 6-8, 9-11 эм 12-14 жыллары толгъанла.

Жюрини эсеплерине кёре, 8-жыллыкъ Даяна Темботова Нальчикни 21-чи номерли орта школдан, 11-жыллыкъ Малкъондуланы Юлия Тырныауузну 5-чи номерли Гимназиясындан эм 14-жыллыкъ Илона Шалова Къарагъач элни 1-чи орта школундан биринчи жерлени алгъандыла. Экинчи жерлеге Амалия Далова, Камилла Каширокова, Аппаланы Элина тийишли болгъандаыла. Ючюнчю жерге уа Ибрагим Хандохов, Ирина Гукова эм Давид Засылкин чыкъгъандыла.

Бу конкурсну эсеплерине кёре, эм иги ишле «Участковый сабийлени кёз къарамлары бла» деген конкурсну  финал кезиуюнде кёргюзтюллюкдюле, деп билдиредиле МВД-ны КъМР-де пресс-службасындан.