Урунуу болумлагъа жангычылыкъла хазырланнгандыла

«Единая Россия» бла мени карьерам» партия проект битеу къыралда да ишлеп башлагъанды. Ол регионлада ишсизликни азайтыугъа бурулупду.   «Единая Россияны» Къырал Думада фракциясыны башчысыны орунбасары Андрей  Исаев айтханыча, бу проект инсанлагъа усталыкъ алып, жетишимли болургъа себеплик этерикди.

Программа былтыр къыралны беш регионунда сынау халда ишлегенин айтырчады. Бу кезиуде алада  жюзден аслам жумуш бардырылгъанды, алагъа он мингден аслам адам къатышханды. Ол санда урунуу ярмаркала, жаш адамлагъа регионда болгъан предприятиялагъа экскурсияла къуралгъандыла.

- Бу башламчылыкъ жаш адамлагъа жюреклери тартхан ишни табаргъа себепликге бурулупду. Аны чеклеринде студентлеге, окъуучулагъа  депутатла, предприятияланы оноучулары, бизнес бла кюрешгенле бла тюбешиуле къураладыла. Аланы кезиуюнде иш излегенде энчиликле ангылатыладыла.  Биз акъыл этгенден, депутат иш бериучюню аллында инсан ючюн жууаплылыкъны кесине алыргъа да боллукъду. Ол а жаш адамгъа ишге тохташыуда артыкъда уллу болушлукъ боллукъду, - дегенди Исаев.

Андан сора да, проектни себеплиги бла жашырын ишлеген предприятияланы азайтыргъа белгиленеди.  Инсанлагъа урунуу законла, аланы эркинликлери ангылатыладыла.  Ишчи келишим этилмеген кезиуде ала пенсиясыз, больничныйсиз, башха социал гарантиясыз къалгъанлары айтылады.

 «Единая Россия» Къырал Думаны къараууна урунуу бла байламлы жангы законну проектин кёргюзтгенин эсгертгенди Исаев. Документ РФ-ни Урунуу министерствосу бла бирге хазырланнганды. Экинчи окъулууда сюзерден алгъа уа документ  регионлада тинтилип, анга эсгертиуле этилликдиле. «Анда сёз кеслерин иш бла жалчытханланы (самозанятый) юслеринден барады», - деп къошханды ол.

 Документде ишсиз къалыргъа къоркъуу болгъан инсанлагъа неда ишлеген жерлерин алышыргъа сюйгенлеге мадарла да белгиленипдиле. Халкъны иш бла жалчытыу аралагъа эсепге энди энчи предпринимательле, кеслерин иш бла жалчытханла да тураллыкъдыла – ала ишлерин тохтатхан эселе.   

Сакъатланы  излемлерин жалчытыугъа энчи эс бурулады жангы законопроектде. Энчи аскерчи операциягъа къатышханлагъа бла аланы юйюрлерине да барды къырал себеплик.

 РФ-ни Къырал Думасыны Къабарты-Малкъардан депутаты Виктория Родина бу башламчылыкъны юсюнден айта, урунуу бла байламлы законла бир низамгъа келтирилгенлерин чертгенди.

- Федерал парламентни къараууна берилген законопроект урунууда хайырлыкъларын кёргюзтген мадарланы жашауда бардырыргъа,  инсанлагъа къырал себеплик этерге бурулупду. Аны болушлугъу бла сынаулары болмагъан жаш адамланы иш бла жалчытыргъа онг боллукъду, иш излегенде чырмаулагъа тюбегенлеге да бардыла энчи мадарла. Аны бла бирге уа жаш адамланы, ол санда школчуланы, окъуудан эркин кезиуде иш бла жалчытыу низам кийирилгенди. Саулукъларына кёре чекленнген онглары болгъанлагъа, энчи аскер операциягъа къатышханлагъа бла аланы юйюрлерине бу жаны бла болушлукъ этилгени да магъаналыды. Алагъа  жангы усталыкълагъа юйреннген кезиуде, къырал эм муниципал предприятиялагъа ишге тохташханда  да энчи эркинликле бериледиле. Алай бла закон партияны халкъ программасы бла келишеди эмда урунуу рынокда болумну эсге алады, - дегенди депутат.