Нейрохирург тиширыу

Кеслерини сайлагъан усталыкълары бла бирге ол сфера бла байламлы илму ызда да жетишимли болгъанларыбыз бардыла. Ала медицинада бютюнда асламдыла. Аллай къыйын ишде ишлей, анда алгъан сынамларын къагъытха тюшюре, ала бла бирсиле да хайырланырча этип, къыйматлы китапла басмалайдыла.  Белгили нейрохирург Чочайланы Аминат да аладан бириди.

Алгъадан чертсек, 2020 жылда ол Санкт-Петербургда Андрей Поленов атлы Россей илму-излем нейрохирургия институтда кесини доктор диссертациясын жетишимли къоруулагъанды. Аны ишине айтхылыкъ, таныулу профессорла багъа бергендиле.

Тырныауузда туугъан къыз анда ючюнчю номерли школну айырмалы тауусуп, КъМКъУ-ну медицина факультетине окъургъа киргенди. Ызы бла билимин ординатурада нейрохирургия ызда ёсдюргенди. Кесини урунуу жолун а Нальчикде республикалы клиника больницада врач-нейрохирург болуп башлагъанды.

2002 жылда илмуланы кандидаты даражалы ишин жазып, огъарыда сагъынылгъан институтда къоруулагъанды. Ол сайлагъан эмда ачыкълагъан «Первичная и первично-отсроченная краниопластика при черепномозговой травме аутокостью черепа» деген тема оюмларыны теренлиги эмда жангычылыгъы бла коллегаларына сейир болгъанды.

Диссертацияларындан тышында да, Аминат Масхутовнаны авторлугъунда танг кесек илму иш басмаланнганды. Ол санда уллу монографияла да бардыла. Аны «Краниопластика аутокостью черепа при черепно-мозговой травме» (Санкт-Петербургда, 2007 жылда басмаланнганды) деген китабына тийишлиликде студентлеге дерсле бериледиле.

Аны пособияларында нервалы системаны, баш сюекни эмда мыйыны бузулуулары, алагъа чып тюшюулери бла байламлы, андан сора да, хирургияны болушлугъу бла багъыу темала тынгылы ачыкъланнгандыла. Ала бла, белгилегенибизча, жаш тёлю, преподавательле, врачла, бирсиле да хайырланадыла.

2008 жылда окъуулу эмда билимли врачны Санкт-Петербургдагъы Елизаветинская деген больницагъа чакъырадыла. Анда бир ненча заманны ишлегенден сора бу шахардагъы РФ-ни МЧС-ини «А. Никифоров атлы мычымай тапдырылгъан болушлукъ эмда радиациялы медицина битеуроссей арагъа» кёчеди эмда анда да бет жарыкълы урунады.

Къыралыбызны шимал ара шахарында ишлеген кезиуюнде аны къолунда багъылгъан саусузла интернетде былай жазгъандыла: «Аминат Масхутовна усталыгъын билген эмда адамлыкъ ышанлары бийик болгъан специалистлигин ачыкълагъанды. Ол кесини багъыу ишини практика амалларын тап къурай эмда бардыра билгени пациентни алгъадан юйреннген жашау халына терк къайтышыргъа себеплик этедиле. Андан сора да, доктор, жаланда бир тюрлю ауруугъа къарап къоймай, стандарт формалада болмай, аз тюбеген ауруула бла да ишлей биледи.

Багъыуну кёзге кёрюнюрча хайырын берген къыйматлы графикни жарашдырып, адамла бла качество жанына къайгъырыулу халда ишлейди. Ариу тиллиди эмда жумушакъ сёзлюдю. Аурууну хорлар ючюн медицина жетишимлени да уста хайырлана биледи».

Бюгюнлюкде ол Тюркде Эскишехирде жашайды. Насыплы анады, юйюр ёсдюреди.

МОКЪАЛАНЫ Зухура.
Поделиться: