«Къыйыныбыз ючюн жамауатны ыспаслыгъын сезген бизге уллу ыразылыкъды»

Моллаланы Фатима доктор болуп, берген антына, сайлаууна да кертичилей къалып келгенли энди отуз жылдан атлагъанды. Бюгюнлюкде ол КъМР-ни Катастрофаланы медицинасы эмда терк медицина болушлукъну арасыны врач-анестезиолог-реаниматологуду. Саулукъ сакълауну айнытыугъа эмда коронавирус инфекциягъа къажау уллу къыйын салгъаны, бийик профессионал усталыгъы эмда кёп жылланы бет жарыкълы ишлегени ючюн 2020 жылда КъМР-ни Башчысыны буйругъу бла «КъМР-ни сыйлы врачы» деген атха тийишли кёрюлгенди. Бюгюн а ол мени ушакъ нёгеримди.

- Фатима, медицина мени жолумду деген  сезимге къалай бла келгенсе?

- Кертисин айтсам, врач усталыкъны сабийлигимден да жаратханма. Аны себепли юйде ата-анабыз, бирсиле да Нальчикни тёртюнчю номерли орта школун тауусуп, КъМКъУ-ну медицина факультетине кирирге излегенимде, анга ыразы болуп къалгъандыла.

 Гитчелигимден да манга юлгю уа ата къарындашымы юйдегиси Гадийланы Людмила Муталифовна болгъанды. Ол кёп жылланы медицинада ишлегенлени профсоюзларыны председателини орунбасары болуп тургъанды. Усталыкъ, адамлыкъ ышанлары бла да ким да хурметлерча инсанды.

Эгечибиз, атабыз ауругъанларында да, аны аслам ахшылыгъын кёргенбиз. Медицинаны сайлап, окъуугъа, ишге киргенимде да, кёп акъыл сёзюн эшитгенме. Бюгюнлюкде да ол къатыбызда тургъанына шукур эте жашайма. Биз кесибиз, энди уа туудукъла да, анга уллу мама дейбиз. Нек дегенде ол барыбызгъа да ёз анабыздан кем къыйын салмагъанды.

Айхай да, къайсы юйюрдеча, атабыз Гадийланы Магомет, анабыз Уяналаны Фаризат да, къадарыбызны мурдору бола,  жашауну жолун кёргюзте, билим алырыбызны излегендиле. Кеслери экишер бийик окъуу юйню тауусхандыла, аны себепли биз да билимлиле, эм биринчи уа ахшы инсанла болуп, халкъыбызгъа жарасакъ сюйгендиле.

- Къайсы усталыкъны келечисине да бийик даража алай бошдан берилип къалмагъаны баямды. Адам ишинде къалай бла жетишимли болады деп сунаса?

- Жаланда салгъан къыйыны, ишине ие кёзден къарагъаны бла. Инсан бардыргъан жумушуна жюреги бла берилирге керекди, анга уллу кёллю болургъа жарамайды. Бюгюн  эталлыкъ ишинги  тамблагъа къоймасанг, къолунгдан келгенни аямасанг, мен болмасам а, ким этерикди деген сезимге берилсенг, баям, ол заманда жетишим да келеди. Аны бла бирге уа адам низамны, жууаплылыкъны да эсинде тутаргъа керекди.

Бийик даражаны сагъыннганыбыздан ары, былайда газетибизни юсю бла ишлеген арабызны директору Алим Владимирович Кардановха,  аны орунбасары Забакъланы Фархад Мухтаровичге, саулай коллективге да мени анга тийишли кёргенлери ючюн ыразылыгъымы билдирирге сюеме.

Дагъыда, билемисиз, баям, адамны жюрек тынчлыгъы болса, юйюрюнде да таянчакълыкъ  тапса, ол заманда да инсан ишине башха тюрлю къарай болур. Ол жаны бла уа кесими насыплыгъа санайма, айып этмегиз.

 Аны не ючюн айтама, алыкъа тёртюнчю курсда окъуй тургъанымда, Моллаланы Махмут бла бир  юйюр къурагъанбыз. Медицина факультетде уа тынч болмагъанын билесиз. Ол кезиуде къайынланы жанындан ангылау, ийнаныу тапханым да кёллендиргенди. Ала билим алырымы, окъуууму жарты жолда къоймазымы излегендиле. Къагъанакъгъа кеслери къарап, болушлукъ этип тургъандыла. Аны себепли адамны къатында кимле болгъанларына кёре ол профессионалча да айныргъа  бегирек талпынады.

- Арт кезиуде врачлагъа къыйын болумлада ишлерге тюшгенди, аны бла байламлы жашаугъа кёз къарамынг а тюрленнгенмиди?

- Анга сёз да жокъду. Врач къадарымда кюн сайын да ёлюм бла бетден-бетге тюбей, саусузну жанын къутхарыр ючюн кюреш бардырыргъа тюшюп тургъанлыкъгъа, бюгюннгю болум ишиме, жашауума да башхача къаратханды.

Айхай да, къыйматла да ёзгергендиле. Саулай жамауат да келген болур энди аллай оюмгъа – бек уллу байлыгъыбыз бизни саулугъубузду. Алгъадан да ол жангычылыкъ болмагъанлыкъгъа, аслам затха шёндюча эс бурмагъанбыз деригим келеди.

Бюгюнлюкде бизни, врачланы, къыйыныбызны адамла ангылагъанлары да эсленеди, аны бла бирге уа намыс-сый да бергенлери хычыуун кёрюнеди. Ишибизни къыйматы ючюн жамауатны ыразылыгъын сезген бизге болмагъанча хурметди.

- Ыразымыса сора сайлауунга?

- Сёзсюз, ыразыма. Биз студент кезиуде алыкъа окъууну тауусхунчу ишлерге эркинлик бар эди да, бир кесекчикни Нальчикде биринчи номерли шахар больницада медсестра болуп тургъанма. Андан сора уа мени урунуу китапчыгъымда жаланда бир жазыу барды. Интернатураны ётерге бери, шёндю ишлеп тургъан жериме келгенме. Ол заманда эндиги арагъа терк болушлукъ бериуню станциясы  (биринчи номерли шахар больницаны мурдорунда) дегендиле. Андан бери мында къалып, урунуп турама.

Станциягъа биринчи келгенимде окъуна ангылагъанма ол мени жерим, жолум болгъанын. Аны себепли андан таймагъанма. Атабыз аскер врач  болуруму сюйгенликге да, кеталмагъанма. Билемисиз, бизге мында узакъгъа созулгъан отпуск  бериучюдюле. Ол заманда да арагъа, коллективге тансыкъ сезим да бийлеучюдю. «Бюгюн ишге баргъан кюнюм болса эди» деп да сагъышланыучума. Баям, уруннган жеримде адамланы ачыкъ, таза ниетлиликлери ючюн окъуна болур алай.

Кесими бир уллу жигитлик этгеннге санамайма, жаланда ишими сюеме эмда аны тынгылы этер ючюн битеу билимими, ангылаууму да аямайма. Саусузну къыйналгъанын селейтир, анга эс тапдырыр амалланы да излегенлей турама.  Нек дегенде, айтханымча, хар кюнден да адамны жанын сакълап къалыр  болумгъа тюбемей къалмайбыз.

- Солугъан заманынг а болуучумуду?

- Ишден юйге келип, юйюрюмю кёрсем окъуна, къайсы тиширыугъача, ол  манга солууду. Ынналарыбыз, аналарыбызча, мен да эшиу эшерге сюеме. Ол къылыгъымы таныгъанла барысы да биледиле.

Дагъыда профессионал  литератураны, поэзияны, прозаны да окъуйма. Омар Хайямны чыгъармаларын жаратама. Аны тизгинлерине саулай дуния сыйынып къалгъанча кёрюннгенден сора да, аладан кёп затха тюшюнюрге да болады.

- Сен таныулу профессионалса, юйде уа тиширыу къаллай болургъа керекди деп сагъыш этесе?

- Къайда ишлесенг да, жууукъ эмда жарыкъ кёллю, къонакъланы сюйген болургъа керексе. Алай сунама эмда аллайланы жаратама.  Инсанны ниети ачыкъ болса, ол эсленмей къалмайды.

Айхайда, къайсы бирибизге да насып сезимни сынатхан - ала бизни жууукъ адамларыбыздыла. Бюгюнлюкде къайын анам-атам, ёз анам да къатыбыздадыла. Андан уллу байлыгъ а къайда барыбызгъа да?!

Гитчелигибизден да аны алайлыгъына тюшюндюре ёсдюргендиле таматаларыбыз. Аны себепли юйюрюбюзге дагъыда туудукъла къошулурла деген жарыкъ умутуму жюрегимде сакълайма.

 

Мокъаланы Зухура.
Поделиться: