Уллу кёллюлюкден хата чыгъар

Барыбыз да билгенден, Жангы жылны аллында Прохладна районда акъылбалыкъ болмагъан эки жашчыкъ суу тийресинде ойнаргъа кетип, къыйын болумгъа жолукъгъандыла. Ала сууну юсю бузлап болгъанын кёрюп, анда учаргъа мурат этгендиле. Алай буз ууалып, аладан бири батып ёлгенди. Аны излеу ишлени РФ-ни МЧС-ини КъМР-де Баш управлениясыны излеу-къутхарыу отряды бардыргъанды.

Алай бюгюнлюкде, сууукъла келгенлери бла баламлы, кёп кёллени башлары къатханды. Аны бла байламлы къутхарыучуланы жарсытхан бир ненча болум барды. Ол да неди десегиз, Нальчикде бла Чирик кёлде кёп атала сабийлерин бузгъа жиберип, ойнаргъа къоядыла. Кёпле аны жубанч сунадыла. Болсада ол терс оюмду. Бизни кёлле ышанырча бузламайдыла эм сакъламай тургъанлай ууалыргъа боллукъдула.

Сёз ючюн, бу кюнледе Нальчикни солуу паркыны тийресиндеги Трек кёлде болум ол халли эди. Атала сабийлерин чаналада учурургъа алып келип, кеслери жагъада туруп, аланы кеслерин жиберип къоя эдиле. Аны бла байламлы кёлню тийресине полициячыла келип, патрульлукъ этгендиле. Алай, къутхарыучула ангылатханнга кёре, ол тийреледе кюн сайын дежурство бардырып турур онг жокъду. Аны себепли ала аталаны эссизлик этмезге чакъырадыла. Нек дегенде хата азданды.

- Жарсыугъа, Жангы жылны аллында Прохладна районда болгъан жарсыулу иш бизни адамланы затха юйретмегени бек сейирсиндиреди. Мен адамладан аллай уллу кёллюлюкню юсюнден билдириуле алгъанлай турама. Энтта да бир кере эр кишилерибизни аллай керексиз ишледен кери болургъа чакъырама, - дегенди Элбрус излеу-къутхарыу бёлюмню 1-чи класслы къутхарыучусу Киштикланы Мазан.

 

Таппасханланы Аминат.
Поделиться: