Тепсеу – юзмез ичинде жаухар жаныуу

Хар зат ырысхы бла ёнчеленнген, уллулукъ да къарыу бла белгиленнген бу къыйын ёмюрде Мутай, жангыз бир таулу жаш, жаланда тепсеу устасы, фахмусуну кючюнден миллетин уллу этгенди. Халкъны адам санын процентле бла айтыргъа бетсинмей, аны хар заманда халкъны бетине тутуп, азсыз да, энши болургъа керексиз дегенча, кёзлери айыутос жумула туруучу адамлагъа ол бек уллу дерсди – таулу Мутайны Европа бийиклигине жетген усталыгъы! Ол да аз пойюлдю. Тепсеу юзмез ичинде жаухар жаныууча, алай жаннган саулукъду! Юзмез ичинде жаухар кибик – халкъыбыз!

Ачыкъ айтханда, дунияда бек жарсыулу ишледен бириди. Азлыкъдан, халкъы аздан ансы, Мутай, тепсеулени тейрисича, дунияда нек айтыллыкъ тюйюл эди? Махтау, ыcnac, ырысхы, саугъа дегенча, усталагъа берилген намыс Мутайгъа нек берилирге керск тюйюл эди? Мен кеси республикабызда демейме, андан тышында, уллу къыралны уллу маданиятында дейме – кюн сайын телевизорда устала къалай айтылгъанларын кёрюп, ичим кюеди да, андан айтама. Кертиси да, къалай къыйын тюшеди аз халкъны закийине! Бютюнда усталыгъы жаланда ёз халкъыны тили, маданияты бла байламлы болгъан адамгъа!

 Мутай, тепсеулени бек уллу поэти, бары дуниялада Лиепадан, бирси орус, не ингилиз, усталадан кем айтылмазлыкъ адам! Ким биледи, Мутай, Махмуд Эсамбаевча, кеси тепсеген болса, миллет тепсеулеге дуния тепсеулерин да къошуп, айтылгъан да этер эди. Дунияда айланып, бары Кавказ тепсеулеге къарс урдургъан «Кабардинка» – ал башындан Мутайны къыйыны, иши бла туугъан эди. Сора ол, «Балкариягъа» келип, аны да аягъы юсюне салды. Алай Москвада неда Лондонда аны ким айтды? Ара телевиденияда къайсы бериуню къурадыла? Азлыкъ деген олду. «Балкария» сахнагъа чыкъгъанлы, биз кесибиз а башхаракъ болмагъанбызмы? Миллет жашауубузгъа ары дери болмагъан даража келмегенмиди? Къалай эсе да бир базыныулукъну, эрттегиликни къууаты! Биз да халкъбыз деген къушкъанат сезим. Тенглик сезими. Аны къаллай багъа бла къайтарыргъа боллукъду?

КъМР-ни халкъ жазыучусу Тёппеланы Алим.
Поделиться: