Танг кесек соруугъа къаралгъанды

Къабарты-Малкъарны Регионнга оноу этиу жаны бла арасы (ЦУР)  республиканы инсанлары бла власть органланы арасында байламлыкъны жалчытырча эм чыкъгъан соруула къысха заманда  тамамланырча ишни  тири бардырады.  Аланы кёбюсю социал сетьледе «Telegram», «Однаклассники, «ВКонтакте» кётюрюлген “Инцидент Менеджмент” системаны амалы бла жарашдырылгъан проблемаладыла. 

Алай быйыл Арагъа социал  сетьлени себеплиги бла онбеш мингден аслам соруу берилгенди.  Аланы кёбюсю, хар замандача, социал къоруулау, жашау журт-коммунал мюлк, тийрени игилендириу, жолланы тапландырыу, саулукъ сакълау бла байламлыдыла. Специалистле аланы хар бирине  тынгылы къарап, профильлерине кёре  тийишли ведомстволагъа билдиргендиле.

Алгъа заманда жууап берилирча бир сагъат сакъларгъа тюшгени кёплеге тап болмагъанды.  Энди уа ол  онбеш минутдан кёпге созулмагъаны ишни бютюн жетишимли бардырыргъа себеплик этеди.

Сагъынылгъан кезиуде ЦУР республиканы  районларында тийишли инстанциялы себеплиги бла эркинликсиз  кир-кипчик тёгюлген жерлени  къурутургъа,  жылыу,  таза суу бла жалчытыргъа, жолланы жангыртырча, кече   жарытырча эм башха жумушланы тамамларгъа болушхандыла.

Андан сора да, «Жарсытхан соруула» рубриканы чеклеринде министерстволаны, ведомстволаны, жер-жерли  администрацияланы  таматалары бла тюзюнлей эфир бардырылгъанды. Аны кезиуюнде социал къоруулау, жолла, билим бериу, ТКО, ЖКХ, саулукъ сакълау, курортла эм спорт бла байламлы юч жюзден аслам соруу сюзюлгенди. Анга Къабарты-Малкъарны Башчысы Казбек Коков  да къатышхнды. Ол   танг кесек соруугъа тынгылы жууап бергенди, ол санда социал-экономика болум бла байламлы стратегияны да ачыкълагъанды.

Аны бла бирге «Ангылатабыз. Къабарты-Малкъар» проектни чеклеринде да регионнга беш жюзден аслам магъаналы темагъа къаралгъанды.   Аны чеклеринде министрле бла тюзюнлей эфирле да ётгендиле.

Араны келечилери хакъсыз  жангыдан усталыкъ алыргъа къалай боллугъун, къыйматлы программаланы, бёлюмлеге жангы технология  сингдирилгенлерини, миллет проектлени, производстволаны, ол санда импортну алышындырыу эм къырал заказла жаны бла къармашханланы юсюнден билдире тургъандыла.

Регионнга оноу этиу ара МЧС-ни республикада баш управлениясы  бла бирге сабийлени арасында ачыгъанла азыракъ болурча профилактика халда «ЦУР КБР/МЧС КБР» деген чат-бот къурагъанды эм  ишлетип башлагъанды.  Аны хайыры бла жамауатны жашаууна эм саулугъуна   къоркъуулу объектлени – башлары ачыкъ къуюланы, тёгереклери бегитилмеген жерлени, къурулушланы эм башхаланы  юсюнден да  билдирирге онг табылгъанды.  Аланы тематикаларына кёре,  ведомстволагъа билдирилип,  проблемаланы кетерирча бир мадар этилирин айтадыла. 

Эсге сала айтсакъ, Регионнга оноу этиу ара офис халда ишлемейди, «Инцидент менеджмент» бир тюрлю соруугъа  эс бурурча социал сетьлени биринде сагъынылыргъа  эм  тынгылыракъ ачыкъланыргъа  керекди.