Школланы жангыртыу керти да халкъ жумуш болгъанды

Къыралны 75 регионунда мингден аслам школда тынгылы жангыртыу жумушла бардырылгъандыла. Келир жыл а 1,5 минг билим бериу учрежденияны жангыртыргъа мурат барды. Бу жумушла Жарыкъландырыу министерствону эмда «Единая Россия» партияны программасыны чеклеринде бардырыладыла. Ол къалай тамамланнганы бу кюнледе партияны эм министерствону келечилерини къатышыулары бла бардырылгъан жыйылыуда сюзюлгендиле.

Жарыкъландырыу министр Сергей Кравцов билдиргенича, 1,1 мингден аслам мекям жангыртылгъанды, аялгъан ахчагъа – 15 миллиард сом – энтта 600 школну тапландырыргъа къолдан келгенди. Министр план кёрюмдюледен артха къалгъан регионланы белгилеп, аланы бардырыугъа жууаплыланы ишни тирилтирге чакъыргъанды.

Партияны генсоветини секретары Андрей Турчак хар объектде да къурулуш къалай бардырылгъанын партияны депутатлары контрольда тутханларын, регионланы оноучулары бла байламлыкъла къуралгъанларын белгилегенди. «Жылны ахырына дери ала барысы да битдирилликлерине ишексизме»,-дегенди ол эмда къурулушну заманында толтурмагъан подряд организацияланы тизмелерин къурап,  келир кезиуде аланы конкурслагъа къоймазгъа кереклисин айтханды.

Андрей Турчак билдиргенича, келир жыл 1,5 минг школда бардырыллыкъдыла жангыртыу жумушла. Анга ахча бюджетде барды. Регионла уа кеслерини юлюшлерин къошарыкъдыла. Программагъа Луганск, Донецк республикала бла Запорожье эм Херсон областьла да къатышаллыкъдыла. Андрей Турчак алада билим бериу учрежденияла кёп жылланы ичлеринде жангыртылмагъанларын, энчи операция бардырылгъан кезиуде ала бютюнда осал халгъа жетгенлерин чертгенди.

- Жангы регионла да келир жылгъа заявкала жазаргъа боллукъдула. Алай бла ненча школну жангыртыргъа кереклиси тергелликди,-дегенди Турчак.

«Единая Россияны» башламчылыгъы бла келир жылдан аялгъан бюджет ахчаны билим бериу учрежденияланы тапландырыугъа къоратыргъа боллукъду. Ол жаны бла тюзетиуле Бюджет кодексге кийирилгендиле. Алай бла регионланы тилеклери болса, ахчаны бу жумушлагъа берирге эркин этилгенди. 

 Сергей Кравцов школланы жангыртыу партияны керти да халкъ программасы болгъанын чертгенди. «Жамауат анга ыразылыгъын билдиргенди, жангыртыу жумушланы дизайнын сайлаугъа  ата-анала, школчула да тири къатышадыла, къурулуш къалай бардырылгъанын сюзгенлей турадыла. Быллай программа бир къыралда да жокъду»,-дегенди министр.

Школланы тынгылы жангыртыу программа РФ-ни Президентини партияны 2021 жылда съездинде этген башламчылыкъларына кёре хазырланнганды. Тапландырыу жумушланы 7,3 минг школда бардырыргъа белгиленеди. Ала къалай тамамланнганларын а партияны эм министерствону оноулары  бла регионлада къуралгъан ата-аналаны штаблары сюзгенлей турадыла.

Партияны «Жангы школ»  проектини КъМР-де регион жамауат советини башчысы, Жарыкъландырыу эм илму министерствону битеулю эм къошакъ билим бериу управлениясыны башчысы  Марина Мизованы айтханына кёре, жангыртыу жумушла республиканы школларында да бардырыладыла. «Аладан онтёртюсю битдирилгендиле, алтысында уа тапландырыу ишле декабрьде бошаллыкъдыла: Нальчикде, Бахсанда, Терк эм Май районлада»,-дегенди ол.