Къанатлыла къыш сууукълада жунчумазча

Къабарты-Малкъарны къырал  бийик тау заповедниги «Къышха къалгъан къанатлылагъа болуш» деген тёрели  акциягъа къатышыргъа чакъырады. Аны магъанасы - жамауатны экология билимлерин ёсдюрюргеди, жаша тёлюге  къанатлыланы юсюнден толуракъ билдириргеди эм алагъа аялу кёзден къарарча юйретиргеди. 

Акция биринчи декабрьден мартха дери барлыкъды. Аны быллай номинациялары барадыла: «Ата журтубузну къанатлылары» - сабийле ишлеген суратла;  «Аш юйчюклени  къанатлы къонакълары» - сурат конкурс; къыш кезиуде къанатлыланы жашауларыны  юсюнден кюн сайын жазып туруу; элберле;  «Ата журтубузну жылы жерлеге учхан эм къышха мында къалгъан къанатлылары» - экология-жарыкъландырыу ушакъ.   

Эсге сала айтсакъ: къышда жылы жерлеге учмай  къалгъан къанатлылагъа кеслерин аш бла жалчытыргъа  бек къыйын болады. Сууукълада жылыныр ючюн ала иги багъылыргъа керекдиле. Аны ючюн алагъа адамны болушлугъу уллу себеплик этеди. Бюгюнлюкде заповедникде 17 къауумгъа кирген  169 тюрлю къанатлы кечинеди.  

Акция бла байламлы бир тюрлю сорууу болгъанла экология жаны бла жарыкъландырыу эм туризм бёлюмню бу телефон номерине сёлеширге боллукъдула: 89287208989. Аны  электрон адреси: Leila.toguzaeva@mail.ru