Бузлатылгъан ашарыкъланы юслеринден тюзю бла терси

Быллай продукцияны – чабакъны, этни, кёгетлени, жемишлени, бишген затланы хайырланыу жылдан жылгъа кёбейе барады. Бузлатылгъан ашарыкъны хатасымы кёпдю огъесе хайыры? Аны бла байламлы къаллай хапарла жюрюгенини юсюнден Россельхознадзорну Къабарты-Малкъарда Референт арасындан билдиргендиле.

  1. Бузлатылгъан продуктла жукъгъа да жарамагъан продуктладыла деген ол терс хапарды. Нек дегенде бу амал табийгъатдан келеди. Кесигиз сагъыш этигиз, къыш сууукълада урлукъла, битимле ненча кере бузлап жангыдан эрийдиле. Алай жаз жылыу келгени бла тамыр берип чагъып тебирейдиле. Алай эсе уа аланы ичлеринде битеу хайырлы минералла, сора дагъыда витаминлени аслам кесеги бузулмай сакъланадыла. Тюзю алайды: бузлатылгъан наныкъла, аладан этилген джемден неда вареньядан эсе хайырлыдыла.
  2. Бузлатылгъан кёгетледе бла жемишледе витаминле сакъланмагъаны тюз тюйюлдю. Алимлени тергеулерине кёре быллай продуктлада витаминлени бир кесеги тюрленмей турады.

Кёбюсюнде кёгетлени бла жемишлени тюз бишгенлей бузлатыучудула. Аланы уа витаминлери ол кезиуде бек кёп болады. Къышда уа, сёз ючюн, быллай неда теплицада ёсген чибижини алыргъа амал бар эсе – бузлатылгъанны алыгъыз. Ол теплицада битгенден къайда хайырлыды.

  1. Бузлагъан эт неда чабакъ хайырлыдыла деген сёзле тюз тюйюлдюле. Ол кеси да аны этилген амалына кёре болады. Быллай полуфабрикатлагъа татыуларын, ийислерин да игирек этген абериле къошуучудула. Кёбюсюнде ала тузлуракъ боладыла. Чабакъны жауу ачы болмаз ючюн аны сууукъ суугъа сугъа кетип, алай бузлатадыла. Алай предприятиялада уа бузну артыгъы бла къошаргъа боллукъдула, аны кесин да чабакъны ичине салыргъа – ол ауур болурча.

Дагъыда аллай суугъа бояула, продукцияны сыфаты ариу кёрюнюрча абериле да къошаргъа боллукъдула. Ма аны себепли саулукъларына сакъ болгъан адамлагъа диетологла быллай полуфабрикатланы ашамагъыз дейдиле.

  1. Бузлатылгъан ашарыкълада микроб болмаучуду деген хапар да ётюрюкдю. Нек дегенде бу заранлы затла сууукъдан эсе иссиге тёзюмсюздюле. Хау, продукцияны бузлатхынчы, биринчиден аны исси суу бла тазалайдыла. Алай этгенде кёп микроб къырылады. Сау къалгъанлары уа жукълагъанча боладыла. Ашны эритгенлей а, ала жангыдан тириледиле. Аны себепли аланы къайтарып исси сууда тутаргъа тийишлиди. Жарты-къурту бузлатылгъан продуктлагъа уа бютюнда сакъ болургъа керекди. Нек дегенде аланы ичлеринде микробла жайылыргъа боллукъдула.
  2. Бузлагъан аш бузулмайды дегеннге да уллу кёллю болургъа жарамайды. Быллай кёгетлени бла жемишлени хайырланыргъа жараулу болжалы эки жыл бла чекленеди. Чабакъдан неда этден этилген ашарыкъланы алты айдан кёп тутаргъа жарамайды. Кеслерин да онсегиз градус сууукълукъдан оздурмай алай. Заманы чыкъгъан продукцияны ашха хайырланыргъа керекмейди.

Ма алайды, бузлатылгъан продукцияны сюйсегиз ашагъыз, сюймесегиз а ашамагъыз. Бюгюнлюкде ашланы бузмай аслам заманны тутаргъа онг берген амал ма олду. Аны себепли ол кенг хайырланылады, тюкенледе, кафеледе азыкъланы да аллай продуктладан этедиле кёбюсюнде.

 

Улбашланы Мурат хазырлагъанды.
Поделиться: