Орамланы тапландырыу ишле тохтамайдыла

Келир жыл «Къоркъуусуз эм тынгылы жолла» миллет проектге кёре, Нальчикни эрттеден бери къаралмай тургъан тогъуз  магъаналы орамына  тынгылы ремонт этилликди.  Аны юсюнден бизге  шахарны  мэриясыны пресс-службасындан билдиргендиле.

Алай бла, Къабарты орамны Идаровадан Осетинскаягъа дери кесеги жангыртыллыкъды. Аны бла бирге Осетинская орам да мардалагъа келиширча этилликди. Аны халине арт заманда шахарчыладан  тарыгъыула келе тургъандыла.  Дагъыда 2-чи Тамань дивизия бла Пятигорск орамла да игилендирилип, излемлеге келиширча боллукъдула.  

Профсоюз орамны бла 2-чи Тамань дивизияны араларында Мазлоева эм  Руставели жоллагъагъа да тынгылы  къараллыкъды. Аны бла бирге Нахушев эм Калмыков орамлагъа да тынгылы ремонт этилликди. Андан сора да, Шогенов атлы орамны  2-чи Тамань дивизиядан Больница  шахарчыкъгъа дери кесегине да къараллыкъды. 

- Биз  шахар округну хар жерине да эс бурургъа кюрешебиз. Ол санда эм биринчи  тозурагъан жоллагъа эс бурабыз. Аны бла бирге шахарда  жолланы болумларын тинтирча дайым контроль этиледи. Кертиси бла да, алыкъа тапсыз жолла  кёпдюле. Болсада игилендириу жаны бла ишле тохтамагъандыла эм келир заманча план да къуралады. Арт жыллада этилген ишлени хайырындан шахарны бети  иги жанына тюрлене баргъанын барыбыз да кёребиз,- дейди Нальчик шахарны мэри  Таймураз Ахохов.