Инсанланы излемлерин жалчытыу – баш магъаналы жумуш

«Единая Россия» хазырлагъан тюзетиуле эсге алынып, федерал бюджет ахыргъы окъулууда къабыл кёрюлгенди. Анда инсанланы социал излемлерине энчи эс бурулгъанды, партияны халкъ программасын жашауда бардырыугъа ахча салыннганды.

2023-2025 жылланы федерал бюджети экинчи эм ахыргъы окъулууда къабыл кёрюлгенди. Анга «Единая Россия» партия хазырлагъан тюзетиуле кийирилип, къабыл кёрюлгендиле. Ала инсанлагъа къырал болушлукъну кёбейтиуге, эллени айнытыугъа, билим бериуню, саулукъ сакълауну, культураны болумларын игилендириуге бурулупдула. Битеу эсгертиуле кийирилгенден сора, социал сферагъа триллион сом салыннганды. Документде баш магъана сабийлери болгъан юйюрлеге болушлукъгъа берилгенди. Аны юсюнден партияны КъМР-де регион бёлюмюню пресс-службасындан билдиргендиле.

- Алгъын жети тюрлю жерден ала эдиле пособияла, энди уа бирикдирилген тёлеуле этилликдиле. Аны жарашдыргъан да женгилирек боллукъду. Госуслуги порталда неда Пенсия фондну бёлюмюнде тийишли документлени толтурургъа керек боллукъду. Тёлеуле уа юйюрню къолайлыгъына кёре тергелликдиле: жашау этерге жетерик ахчаны 50, 75 неда 100 проценти тенгли,-дегенди «Иги иш – юйюрде къолайлыкъ» партия проектни жашауда бардырыугъа жууаплы, партияны Къырал Думада фракциясыны таматасыны орунбасары Андрей Исаев.

Айлыкъны, пенсияны, жашау этерге жетерик ахчаны   ёлчемлери да тюрленирикдиле. Социал пенсияла бла аналыкъ капитал 12 процентге кёбейтилликдиле.

Андрей Исаевни айтханына кёре, биринчи сабий туугъанда аналыкъ капитал 590- минг сом, экинчиге уа (биринчи сабий ючюн тёлеуле этилмеген эселе) анагъа 700 минг сом берилликди.

«Единая Россияны» башламчылыгъы бла 2,5 миллиард сом профессионал билим бериуге бла профориентациягъа берилликди. 1,4 миллиард сом тамата классланы окъуучуларын программированиягъа юйретиуге къоратыллыкъды. 450 миллион сом жаш тёлю предпринимательствону программасына, 250 миллион сом а студент отрядланы къауумларына киргенлени ишчи усталыкълагъа юйретиуге бёлюнеди.

Инсанланы иш бла жалчытыугъа энчи эс бурулады. Бу жаны бла жумушлагъа къошакъ халда 2,7 миллиард сом бёлюннгенди. Ол санда 17 регионда халкъны иш бла жалчытыу  араланы жангыртыргъа белгиленеди.

- Санкцияла бла байламлы экономика тюрленнгенди, ол а адамланы къолайлыкъларына хата салыргъа боллукъду. Урунуу министерство бла келишимле этилип, ишлерин тас этгенлени жангы усталыкълагъа юйретиу бардырылады. Ол а кесини хайырлылыгъын кёргюзтгенди. Аны себепли бу ишге къошакъ халда 2,5 миллиард сом бёлюнюрюкдю,-дегенди Андрей Исаев.

Саулукъ сакълаугъа 1 триллион сом салыннганды. Эл мюлкге уа – 58 миллиард сом. Партияны эсгертиулерине тийишлиликде, бу сферагъа энтта 8 миллиард сом бёлюннгенди. Ахча эллени комплекс айнытыугъа къоратыллыкъды. Мелиорация жумушлагъа бла АПК-да  илму-техника проектлеге бирер миллиард сом къоратыллыкъды.

- ВВП азайгъан эсе да, эл мюлкде ёсюу эсленеди. Жууукъ кезиуде аны андан ары айнытыргъа керекди. Бизни башламчылыгъыбыз бла  связьны жумушларына къошакъ халда 8 миллиард сом бёлюннгенди. Ол эл мюлк бла байламлы тюйюл эсе да, элледе жашауну игилендириуге бурулупду: интернет бла телефон байламлыкъла тартыллыкъдыла,-деп чертгенди Андрей Исаев.

Социал магъаналы жумушланы толтургъан жамауат организациялагъа болушлукъгъа бёлюннген ахчаны ёлчемин азайтмазгъа кереклиси да белгиленнгенди. Партияны эсгертиулери бла  аны ёлчеми былтыр тенгли къалгъанды.  

- Биз кертилик жанлы партиябыз.  Россей къыйын экономика болумгъа тюшгенди, бизни бла санкция уруш башланнганды. Болсада Правительство бла бирге артыкъда магъаналы жумушланы жашауда бардырыргъа келишгенбиз. Ол санда социал магъаналы жумушла къысхартылмагъандыла, алагъа ахча кёбейтилгенди. Алай бла инсанларыбыз къытлыкъны санамазча этилликди,-деп чертгенди Андрей Исаев.

КъМР-ни Парламентинде «Единая Россияны» фракциясыны таматасы, Бюджет, налогла эм финанс рынокла жаны бла комитетини башчысы Михаил Афашагов айтханыча, келир жылны республикалы бюджетин хазырлау жаны бла иш бардырылады. Аны проекти жамауат тынгылаулада сюзюлгенди.

- Баш финанс документни хазырлагъан кезиуде партияны халкъ программасында белгиленнген социал жумушланы жашауда бардырыугъа энчи эс бурулгъанды,-дегенди ол эмда  республиканы кеси файдалары ёсгенин белгилегенди.

 

 

Басмагъа Тикаланы Фатима хазырлагъанды.
Поделиться: