БУХГАЛТЕР

Элбрус районда Жаппуланы Мажитни къызы Лейляны танымагъан хазна адам болмаз. Атасы Мажит  кёп жылланы  вольфрам-молибден комбинатда ишлегенди, анасы Аминат а бир ненча жыл мындан алгъа жашаудан кетген эди. Беш сабий ана жылыусуз къалгъанда, аталарына юйюрде  тамата Даниял бла Лейля  таянчакъ болгъандыла. Ала гитче  къарындашлары бла эгечлерине ёксюзлюк сынатмазгъа кюрешгендиле.

Заман оза, сабийле да ёсе, бир бирлерине билеклик эте, билим ала, жашаугъа кеслерин жарашдыра келгендиле. Бюгюнлюкде ала бары да абаданла, юйлю-юйюрлю болуп жашауда жерлерин тапхандыла. Кёпле уа алагъа сукъланнган окъуна этедиле: бир бирлерин былай ариу кёрюп, къаты жюрютгенлерине.

Сабийлени бешиси да айырмалы билим алгъандыла Даниял районда  айырыу комиссияны председателиди, Лейля  Терс-Къолда уллу  къонакъ юйледен биринде, чекленнген жууаплылыгъы болгъан «СКИ-ОЗОНДА» баш бухгалтерди, Ануар  предприниматель иш бла кюрешеди, Миша котельняда ишлейди, Лариса да Москвада энчи ишин къурагъгдны.

Юйюрню тутуругъу уа Лейляды дерчады. Ол, атасы ауушхунчу анга къарап, юй жылыуун  суутмай тургъанды. Мажитни сабийлери ата юйлерине келирге не заманда да бек сюйгендиле. Бусагъатда  аналары, аталары да болмагъанына къарамай ала Лейляны жокълайдыла. Алагъа аналарыны орнуна ол тюбейди, хар бирине да ариу айтып, тансыкълап, алларына аш-суу салып къууандырады.

Мектепни  бошап, Лейля, Къабарты-Малкъар къырал университетни экономика факультетине кирип, бийик билим алгъандан сора районда сбербанкда экономист-ревизор  болуп, ызы бла уа районну администрациясында баш  ревизор болуп да ишлегенди. 2004 жылда уа  аны районну Билим бериу управлениясында баш бухгалтерге  саладыла. Анда да кёп жылланы  бет жарыкълы уруннган къызны ишине бир адам да чурум тапмагъанды.  Жашай баргъан заманда кёп зат да тюрленеди. Районну башчысына башха адам да салыннганда, ары дери бир тюрлю  терс иши болмай ишлеп тургъан къызны орнуна кесини жууугъун, кеси адамын салыргъа керек болгъанда, аны ишине чырмаулукъ эте, чурум табаргъа кюрешип башлайды. Алай бла  район башчы бла кёп даулаша турмай, къыз ишден кёчюп, баш иеси бла Магаданнга  кесип, анда да  юч-тёрт жылны  бухгалтерлик этип ишлегенди.

-Мен  ишлеп кетген онтёрт жылгъа жууукъ заманны ичинде районда болгъан бюджет организацияланы, предприятияланы барына да ревизия этерге керек болгъанды. Не букъдурлугъу барды, законнга бузукълукъ этилген кёп затланы ачыкъларгъа тюшгенди. Он уголовный иш да  ачылгъанды.

Район гитчеди, анда бир бирни танымагъан, билмеген адам жокъду. Ревизорну иши къыйынды. Бек  осалы уа – адамны экономика аманлыгъын ачыкълауду, кёбюсюнде  ишден да аны  ючюн кетген эдим. Бюгюнлюкде уа  мени кесими ишими тинтирге келедиле ревизорла,-дейди Лейля.

Жаппуланы къыз бухгалтер болууунда кесини биринчи насийхатчысы Этезланы Хамитни къызы Аслижанны санайды, аны  атын сюйюп эсгереп. Ол жууаплы ишни кёп жашырынлыкъларына юйретгенди. Бюгюнлюкде да, устазыны айтханын эте, Лейля, къонакъ юйде ишлегенлени хакъларын заманында берир ючюн, солуу, байрам кюн деп къарамай, ишлерге хазырды. Ахча  керек болуп кыйналгъаннга а болушургъа онг табар. 

-Ишде бек  башы- низамды, тизгинлиликди. Бухгалтерге уа ол затла  кимден да бек керекдиле,-дейди Лейля. –Ишге кеч  къалмай  келирге, анга аз да  уллу  кёллюлюк этмезге биринчи кюнден окъуна юйретгенме кесими. Аны  хайырындан ишинг да тап барады. Сёз да жетмез, жюрегинг да  хош болур. Битеу бу затлагъа Аслижан Хамитовна юйретгенди. Бюгюнлюкде да биргеме ишлегенледен да аны излейме.
Этезланы Аслижандан сора да болгъандыла Лейлягъа насийхатчылыкъ этгенле. Аладан бири Эдакаланы Азизады. Бюгюнлюкдне да Жаппуланы къыз аланы барысыны да атларын уллу жюрек ыразылыкъ бла сагъынады.                                                                       

Холаланы Марзият.
Поделиться: