Жангычылыкъны мураты – къолайсыз юйюрлеге къырал болушлукъну бир системасын къурауду

"Демография" миллет проектни чеклеринде КъМР-ни урунуу эмда социал къоруулау министри Асанланы Алим аналагъа бла сабийлеге къыралны жанындан себеплик этиуню жангы мадарыны магъанасын ангылатханды.

«Россей Федерацияда сабийли юйюрлеге социал болушлукъ этиу жаны бла  мадарланы талайы жашауда бардырылады – тиширыуну сабийден ауур болгъан кезиуюнден башлап  баласына 17 жыл толгъунчу дери.

Бюгюнлюкде социал болушлукъну алыр ючюн, заявление жазаргъа керек болады. Сабийден ауурлугъу болгъан тиширыу медицина организациягъа эсепге эртте тюшген эсе, ол Пенсия фондха заявление жазып, ай сайын пособие алыргъа боллукъду. Ол а регионда жашау этерге жетерик ахчаны бек аз ёлчемини 50 процентин  тутады. Къабарты-Малкъарда сабийге жашау этерге жетерик ахчаны бек аз ёлчеми уа шёндю 15 805 сомду.

Биринчи сабийи туугъандан сора да анагъа ай сайын ахча тёленеди – жашау этерге жетерик ахчаны бек аз ёлчеми. Алай юйюрню файдасы, хар адамгъа тергегенде, жашау этерге жетерик ахчаны эки къатысындан аз болургъа керекди. Биринчи неда ючюнчю сабий туугъанда  неда ёсдюрюрге деп алыннганда уа, пособияны юсюнден заявление бизге – Урунуу эмда социал къоруулау министерствогъа – жазылады.

Экинчи сабийге уа пособияны Пенсия фонд аналыкъ капиталдан тёлейди. Ол мадар сабийге юч жыл толгъунчу себеплик этер ючюн тохташдырылгъанды.

Къолайлары азыракъ болгъан юйюрлеге аллай тёлеуле 3-7-жыллыкъ эмда 8-17-жыллыкъ сабийлери ючюн бериледиле. Бюгюнлюкде ол пособияланы хар бири да  белгиленнген кезиуге (бир жылгъа) тохташдырыладыла. Аны алыр ючюн, заявление эмда юйюрню къолайсызлыгъына шагъатлыкъ этген документле да берирге тийишлиди.

Кесигиз да кёресиз, бу амал кёп къыйын салыуну излегенин эмда адамлагъа тапсыз келгенин. 2023 жылда 1 январьдан башлап къыралыбызда Универсал пособие кийириледи. Ма ол алгъыннгы мадарланы бирикдирликди. Аллай тюрлениуню мураты – къолайсыз юйюрлеге къырал болушлукъну бир системасын къурауду. Анга кёре тюрлю-тюрлю тёлеулени тергегенде эмда алагъа тийишли болууну бла къалыуну тохташдыргъанда  бир жорукъ хайырланыллыкъды», - дегенди министр.