Жаш тёлюню сейирлерине къайгъыра

Монополиялагъа къажау федерал службаны КъМР-де Управлениясында (УФАС) Къабарты-Малкъар къырал аграр университетни «Экономика эм управление» факультетини окъуучуларыны къауумуна «ачыкъ эшиклени кюнюн» бардыргъандыла. Аны юсюнден вузну пресс-службасындан билдиргендиле.

Ведомствону башчысы Анна Кумахова къонакъланы Управленияны иши бла шагъырей этгенди, алагъа къаллай борчла салыннганын да айтханды. Студентле анга иги къулакъ салып тынгылагъандыла, монополиялагъа къажау законодательствогъа этилген бузукълукъланы, тапсыз конкуренцияны,  ушагъыусуз рекламаны,  аллай затла ючюн жууаплылыкъны юслеринден кёп магъаналы зат эшитгендиле.
Анна Кумахова УФАС-ны Жамауат советини ишин да иги жаны бла белгилегенди. Айтханына кёре, ары КъМКъАУ-ну «Экономика эм управление» факультетини башчысыны орунбасары Зумакъулланы Фатимат бла илму-излем бёлюмюню таматасы Аслан Жемухов да киредиле.

Къысха айтханда, бу тюбешиу жаш тёлюге керти да сейир болгъанды дерчады; ала анга сюйюп къатышхандыла, сорууларын да кем этмегендиле. Анна Кумахова «Быллай тюбешиуле жаш тёлюню ичинде къырал граждан службаны даражасын кётюрюрге себеплик этедиле», – дегенди. Вузну келечилери уа студентледе ол ведомствону ишини юсюнден толу ангылаулары боллугъун белгилегендиле.

Омарланы Мурат хазырлагъанды.
Поделиться: