Сынауларын ишде кёргюзтгендиле

Нальчикни 1-чи автовокзалыны тийресинде къутхарыучуланы от тюшюуге къажау – амаллагъа юйрениулери болгъандыла.  Ёртенни  ёчюлтюу жаны бла бёлюмню башчысыны орунбасары Салим Люев къарауулла бла жараула ётдюргенди. Аланы борчлары мекямны отдан сакълауну мадарларына  къараргъа, адамла аслам жыйылгъан жерде къутхарыу операцияны бардырыуда байламлыкъда ишлеуде сынамларын ёсдюрюрге эди.

Юйрениулени кезиуюнде  административ мекямны экинчи къатысына от тюшгенча этилгенди.  От ёчюлтюучюле, алайгъа жетип,  халны тинтгендиле, ичлерине  жалын ётмезча оборудованияны  да хайырланып, отоулагъа киргендиле, аладан адамланы чыгъаргъандыла. Андан сора  отну ёчюлтюп башлагъандыла: техника кереклени терк жайгъандыла, суу быргъыланы тартхандыла, хар къутхарыучу жууаплы болгъан жерине тургъанды. 

Салим Люев белгилегенича, от ёчюлтюучюле барысы да салыннган борчланы тынгылы тамамлагъандыла, бир-бирлери бла байламлыкъда ишлей билгенлерин кёргюзтгендиле. Андан тышында, мекямны  адамланы кёчюрюу  жоллары,  суу бла жалчытыуну амаллары  сыналгъандыла, эсгертиуле этилгендиле.