Балконла бла лоджияла фатарны битеулю жерине кирмейдиле. Республиканы Кадастр палатасындан аланы араларында башхалыкъ неде болгъанын ангылатхандыла.

Адамла фатарлада балконла бла лоджияла болгъанларына юйреннгендиле.  Палатаны баш юрисконсульту Ирина Карданова айтханыча, аланы башхалыкъларын ангылар ючюн, бир шартха эс бурургъа керекди: ол фатардан тышына чыгъамыды, огъесе аны кесегимиди. Алай бла балкон фатардан тышына чыгъарылып ишленнген, тёгереги буруула бла бегитилген конструкцияды. Лоджия уа юйню ичинде къалады, юч жаны да къабыргъала бла жабылады.

Россейни Жашау журт кодексине тийишлиликде фатаргъа отоула, ол санда инсан турмуш жумушларын этген жерле киредиле, балконла, лоджияла, верандала бла террасала аланы къауумунда тюйюлдюле. Законну бу тюрлюсю 2005 жылда къабыл кёрюлгенди, ары дери балконла бла лоджияла фатарны кесегине саналгъандыла. Фатарны битеулю жери аны сатыу-алыу багъасы, жылытыу эм башха коммунал тёлеуле бла къысха байламлы болгъаны себепли Кадастр палата адамланы бу шартха эс бурургъа, законодательствогъа келишмеген кезиулени тюзетирге чакъырады.

Фатарлары къаллай бир жерни алгъанын адамла кеслери ёнчелерге неда Кадастр палатаны специалистлеринден болушлукъ излерге боллукъдула. Специалистлеге приёмгъа 8 (8662) 93-00-17 телефон бла жазылыргъа жарарыкъды.