Школчула биригиу бла шагъырейленнгендиле

Кёп болмай «Турникетсиз ыйыкъ» битеуроссей акцияны чеклеринде Нальчикни  школчулары бла устазлары «Телемеханика» биригиуде болгъандыла. Аны, хар замандача, Россейни Машинала ишлеген союзу къурагъанды. 

Акцияны магъанасы - студентлени, школчуланы эм аланы ата-аналарын предприятияланы иши бла шагъырей этергеди. Алагъа ишчи жерлени, урунуу рынокда сурам болгъан усталыкъланы, бюгюннгю  промышленностьну  эм производствону юсюнден да хапарлагъандыла. 

 Бу жол предприятияны  92 окъуучу бла 6 педагог жокълагъанды. Ала предприятияны  кёрмюч залларында, цехлеринде болгъандыла, бюгюннгю оборудованиягъа эм  электрон устройстволаны производствосуна да къарагъандыла.  Жаш адамла энергокючню аягъан жарытыучу приборланы, кюнню таякълары бла ишлеген акъыллы светофорланы, токну эсеплеген приборланы, буз булутланы  чачхан установканы эм башха сейир  затланы къурамлары эм производстволары  бла шагъырейленнгендиле.  Специалистле аланы хар бири къалай ишлегенлерин, неге жарагъанларын билдиргендиле эм сорууларына да толу  жууапла бергендиле.    

Эсге сала айтсакъ,  акция жылгъа эки кере ётеди - апрельни бла октябрьни ючюнчю ыйыкъларыны ахырында.  Проектни хайыры бла школчула бла студентле предприятияда производствону кеси кёзлери бла кёрюрге, иши бла толуракъ шагъырейленирге онг табадыла. Бюгюнлюкде урунуу рынокда  ишчи усталыкъладан къайсыларына уллу сурам болгъанын, ол санда иги файда тюшюрюрча не бла кюрешсе иги боллугъун  биледиле. 

 

Поделиться: