Хар сёзю жюреклеге терен тюшгенди

Озгъан бараз кюн Шимал Осетия-Аланияны ара шахары Владикавказда Халкъланы шуёхлукъларыны юйюнде белгили осетинли назмучу, жарыкъландырыучу, жамауат къуллукъчу, дюгер халкъны адабиятыны мурдорун салгъан Коста Хетагуровну туугъан кюнюне аталып тюбешиу болгъанды. Анга Шимал Осетияны эм Шимал-Кавказ республикаланы белгили жазыучуларыны къаууму къатышхандыла. Бизден Къарачай-Черкесни халкъ поэти Додуланы Аскер, журналистле Османланы Хыйса бла Байтуугъанланы Исмайыл баргъандыла.

Бу ишни Шимал Осетия-Аланияны Миллет политика эм тыш къыралла бла байламлыкъ жюрютген министерствосу эмда Халкъланы шуёхлукъларыны юйю къурагъандыла.
Программада поэтни жашау, чыгъармачылыкъ жолуну юсюнден Шимал Осетияны, Къабарты-Малкъарны, Чеченни, Осетияны къырал университетини алимлери, жазыучулары, жамауат организацияланы келечилери оюмларын айтхандыла.

Бу ишни Халкъланы шуёхлукъларыны юйюню таматасыны орунбасары Тамара Кайтукова башлагъанды. Бардыргъан да ол этгенди. Уллу залгъа жыйылгъан адамланы келген къонакъла бла шагъырей этгенден сора, сёзню Осетияны къырал университетини осетия филология факультетини деканына береди. Ол «Осетинская лира» китабын кёчюргенини, анда назмуланы магъаналарыны, аладан жазылгъан жырланы юслеринден айтханды.

– Адамла тууадыла, ёседиле. Бу дунияда иш, жумуш тындырадыла. Ууахтылары жетселе, кетедиле узакъ дуниялагъа. Ёмюрле  бир бирлерин алышадыла. Тёлюлени бирлери кетедиле. Аланы орунларына башхалары келедиле. Озгъан заманланы жигитлери аз-аздан унутула барадыла. Алай Костача адамла къаладыла халкъларыны эсинде ёмюрлеге. Халкъы болгъан къадарда аны аты, айтхан сёзю бир заманда унутулмаз. Коста деменгили халкъны деменгили уланыды, - дегенди Османланы Хыйса да.

«Минги-Тау» журналны баш редактору Додуланы Аскер а былай деди: «Костаны чыгъармаларын бек алгъа анам айтып эшитгенме. Ол аны «Ёксюзлени анасы» деген назмусун окъуса, биз жилямай къалмай эдик. Артда мен аны назмуларын кёчюрюп тебирегенде, ол манга андан да жууукъ болгъан эди. Аны чыгъармалары къуру осетин халкъныкъыла тюйюлдюле. Мындан арысында да биз аны назмуларын кёчюре турлукъбуз».

«Мах Дуг» журналны критика, публицистика бёлюмюню таматасы, филология илмуланы кандидаты Тамерлан Техов Костаны жашау чыгъармачылыкъ жоллары республика изданиялада къалай ачыкъланнганыны юсюнден айтханды.

Назмучу, тилманч Залина Басиевагъа сёз жетгенде, ол поэтге атагъан назмусун окъугъанды. Залинаны чыгъармалары бла алгъаракъладан бери шагъырей болуп тургъан Додуланы Аскер  анга Къулийланы Къайсынны хурметине чыгъарылгъан майдалны бергенди. Байтуугъанланы Исмайыл да Осетия дегенде бек алгъа Коста Хетагуров эсине келгенин чертгенди.

Шимал Осетияны къырал университетини башланнган классланы эм школгъа барыргъа жыл санлары жетмеген сабийлени кафедрасыны доценти, педагогика илмуланы кандидаты Фатима Цораева Костагъа атап школчула бла оюнла салгъанын айтханды. Сора закийни къауум назмусуна кёре къурашдырылгъан жырланы, пианинону согъуп, жырлады.

Владикавказны библиотека системасыны краевед бёлюмюню таматасы Римма Дзугаева да поэтни юсюнден кёп сейир хапар айтханды. «Коста Хетагуровну кёп затдан ангылауу бар эди. Осетияны культурасына  салгъан къошумчулугъуну чеги жокъду. Осетин миллет назмучулукъну къурауда  аны классика формасын кёргюзтгенди. Ол халал жюрекли адам эди. Жарлылагъа болушханны кесине борчха санагъанды»,-дегенди. 

«Растдзинад» газетни баш редактору Борис Хозиев да оюмун айтханды. Ызы бла белгили осетинли жазыучу Энвер Хохоев Костагъа атагъан назмусун окъугъанды. Чеченден келген Ибрагим Арсанов а закийни кеси тилине кёчюрген назмуларын айтханды.

Ахырында Халкъланы шуёхлукъларыны юйюню таматасы Александр Охотников ары келгенлеге жюрек ыразылыгъын билдирип, алгъыш этгенди. Осетияны адабияты бла байламлыкъ жюрютгенлери ючюн Додуланы Аскерге бла Османланы Хыйсагъа махтау къагъытла бергенди.