Къолу чомартны жюреги да жарыкъ болады

Нальчикде сабий кийимле, илляула сатхан  «Кенгуру» тюкенни иеси предприниматель Заммаланы Асият  «Намыс» сабий реабилитация арада кечиннген жашчыкълагъа бла къызчыкълагъа дайым къайгъыргъанлай турады. Быйылгъы окъуу жыл башланырны аллында да ол огъурлу ишлери бла сабийлени къууандыргъанды. Асият алагъа кёлекле, жыйрыкъла, костюмла, жылы ёрге жанла, курткала, къаламла, дефтерле, тюрсюнлю карандашла элтгенди. Аланы хуржунлагъа жыйып, аны юсюне хар сабийни тукъумун, атын жазып, къолларына тутдургъанды. Дагъыда  тюрлю-тюрлю илляула да саугъалагъанды.

Андан сора да, ол къызчыкъланы бла жашчыкъланы кёллерин жарытырча ары дагъыда «Сюрприз» гяпчи къауумну да чакъыргъанды.Ары дери уа Асият, «Намысха» бир нёгери бла келип, хар сабийден ол не зат сюйгенин соргъан эди. Хар бирини юс кийимлерини ёлчеуюн алып кетген эди.    

«Намысда» бусагъатда эллиден артыкъ сабий кечинеди. Аланы асламысыны ата-аналары ичгичиле неда наркоманладыла. Бирлерини уа къарар адамлары жокъдула. Араны директору Адальби Карданов а Заммаланы Асиятха жаланда саугъаланы келтирип къоймагъанлай, жюреклери такъыр сабийлеге байрам къурагъаны ючюн ыспас этгенди. «Бу  жолгъа дери да алагъа кийимле, ашарыкъла, илляула келтиргенле болгъандыла, алай  ёсюмлерин ёнчелеб а киши  кюрешмегенди»,- дегенди ол тюбешиуню чегинде.

Ол кюн абадан жашчыкъла бла къызчыкъла уа тепсеуде, жырда, назму айтыуда усталыкъларын кёргюзтгендиле. Кёллери жарыгъан сабийле, огъурлулукъгъа тартылып, жарыкълыкъгъа, игиликге тюшюнедиле, ийнанадыла. Анга себепликни уа дайым быллай жумушланы сюйюп къурагъан Заммаланы Асият да себеплик этгенлей турады.