Эл мюлкде къармашханлагъа – онгла

Россейни Правительствосу къыралда эл мюлкге болушлукъ бериуню кенгертеди. Тийишли онгла алыргъа боллукъланы санына энди кеслери алларына иш бардыргъанла, иели мюлклери болгъанла да киредиле. Дагъыда селекция-урлукъчулукъ арала къураугъа этилген къоранчланы аслам кесегин къайтарыргъа дейдиле. Аны юсюнден КъМР-ни Эл мюлк министерствосундан билдиргендиле.

Иели мюлклери болгъанлагъа Правительство учуз кредитле бла себеплик этерге амал бергенди. Аллай кредитни ёлчеми беш процент бла чекленеди. Ахча алыргъа боллукъланы санына кеслери иш къурап, профессионал файда тюшюргенлеча, налог тёлегенле да киргендиле. Кредит къысха болжалгъа угъай, инвестициялы жумушлагъа (12 жылгъа) да берилирге боллукъду. «Алай бла къармашып, аш-азыкъ бла жаланда кеслерин эмда юйдегилерин жалчытхан эллиле, аны бла чекленип къалмай, ишлерин айнытыргъа, андан ары кенгертирге онг табарыкъдыла», - дегенди премьер-министр Михаил Мишустин.

Бизге осал кёзден къарагъан къыралла салгъан чеклениулеге да къарамай, Россейни агропромышленность комплекси айныуну жолундан таймай ишлейди. Алай дагъыда Президент ол санкцияла салгъан хатаны азайтыргъа буйрукъ бергенди. Михаил Мишустин айтханнга кёре, ол къол салгъан бегимге тийишлиликде аграр бизнес тыш къыралла бла тёлеулерин заманында эталлыкъды. Алай болурча Россейде кредит организациялагъа субсидияла бериу жорукъла тюрлендирилгендиле. «Аны себебинден агропром къыралдан андан ары да болушлукъ кёрюп турлукъду, ол санда алгъын беш процент бла берилген инвестициялы займланы юсю бла да», - деп чертгенди Правительствону Председатели.