Адамланы солууларын тынгылы къураугъа – энчи эс

Сентябрьде къыралда туризм бёлюмде  жангы жорукъла ишлеп башлагъандыла, ала адамланы солууларын игилендирир муратда кийирилгендиле.

Электрон путёвка

Энди туроператорла кеслерини ыразылыкълары бла «Электронная путёвка» системагъа кёрюмдюлени иерге боллукъдула, аны борчу бу жаны бла рынокда законсуз схемаланы азайтыргъа, туристлени эркинликлерин къорууларгъа эм ала къыйын болумгъа тюшгенде, терк болушлукъ этергеди. Бизнесге сынау халда болжал салынады, ол заманны ичинде бузукълукъ чыкъса, ала жууаплылыкъгъа тартыллыкъ тюйюлдюле.

Тыш къыраллагъа ол болжал 2023 жылны 1 мартына дериди, къыралны ичинде неда тыш къыралладан келген туристлеге солууну къурагъанлагъа – 2023 жылны 1 сентябрине дери. Система къалай ишлегенин ангылатырча бизнесге хакъсыз вебинарла да къураллыкъдыла.

Экскурсоводла бла гид-тилманчла

Экскурсия жумушланы качестволарын игилендирирча  Ростуризм экскурсоводланы бла гид-тилманчланы бир федерал реестрин жарашдырады. Анда эсепге тюшер ючюн, аттестацияны ётерге керекди. Бу жумушну толтуруугъа  болжал 2023 жылны 1 июлюна дери бериледи. 2023 жылда  1 июльгъа дери бу ишни адамла  кеслерини ыразылыкълары бла тамамлаяллыкъдыла. Андан сора эсепге борчлу халда тюшерге керек боллукъду, аттестацияны ётгенлерини юсюнден шагъатлыкъ къагъытла бла 5 жылны ичинде хайырланыргъа жарарыкъды. Ары дери алыннган документле 2024 жылда  1 январьгъа  дери ишлерикдиле. Аттестация комиссияла субъектлени туризм жаны бла толтуруучу власть органларында ачыллыкъдыла. Экскурсоводла бла гид-тилманчла эсепге ишлеген регионларында тюшерге тийишлидиле.

Аттестацияны ётерге борч музейледе уруннганлагъа, дин неда паломничество организацияланы келечилерине салынмайды.

  Инструктор-проводникле

Турист компанияла къыйын маршрутлагъа солугъанланы биргелерине инструктор-проводниклени иерге тийишлидиле. Аллай маршрутлагъа табийгъат чурумлары болгъанла саналадыла, аланы тизмеси бла спорт туризмден, альпинизмден эм башха тийишли федерацияланы сайтларында шагъырейленирге жарарыкъды. Къыйын маршрутлада ишлерге сюйген проводникле да энчи аттестацияны ётерикдиле.

Законнга кёре  бир жылны ичинде бу жумушну инсан кеси ыразылыгъы бла толтураллыкъды, 2023 жылда 1 июльдан башлаб а аттестацияны борчлу халда ётерге тюшерикди, деп билдиредиле республиканы Курортла эм туризм министерствосундан.