Тыш къыралгъа баргъан акъылбалыкъ болмагъаннга излемле

Чекчи управление ангылатады

«Минеральные Воды» чекчи пунктда быйыл майдан бери  30 акъылбалыкъ болмагъанны тыйгъандыла. Аланы  законлу келечилери  къыралдан тышына барыргъа эркинлик берген документлери жокъ эди. Россейли законлагъа тийишлиликде, чекчиле сабийлеге къыралдан тышына чыгъаргъа къоймагъандыла.

16 жыллары толгъан алтауланнга уа РФ-ни Административ бузукълукъланы кодексини 18.4-чю статьясына кёре терслеу материалла жарашдырылгъандыла. Ала къыралдан тышына  баргъан кезиуде низамны бузгъанлары ючюн жууапха тартыллыкъдыла. Ол жаны бла документле ала жашагъан жерледе акъылбалыкъ болмагъанланы ишлери жаны бла комиссияланы къарауларына берилгендиле.

Къырал чекни тийресинде быллай даулашланы болдурмаз ючюн а сабийлени законлу келечилери алгъадан да битеу тийишли документлени хазырларгъа, сабийни къыралдан тышына барыргъа эркинлиги болгъанын бла къалгъанын билирге керекдиле, деп ангылатхандыла бизге   РФ-ни ФСБ-сыны КъМР-де Чекчи управлениясындан.

1996 жылда 15 августда чыгъарылгъан «Россей Федерациядан тышына баргъанда эм РФ-ге келгенде низамны юсюнден» 114-ФЗ номерли законнга тийишлиликде,  акъылбалыкъ болмагъан  башха къыралгъа баргъан кезиуде биргесине законлу келечиси болургъа керекди – атасы, анасы, осуйлукъ этген инсан. Ала ашырмай эселе уа, тыш къыраллы паспорт бла бирге аны законлу келечилери Россейден тышына баргъанына эркинлик бергенлерине шагъатлыкъ этген документи да болургъа тийишлиди. Аны нотариус  къабыл кёреди.

2021 жылда 1 июльда чыгъарылгъан  268-ФЗ закон башында белгиленнген федерал законнга тюзетиуле кийиргенди. Алагъа кёре, нотариус хазырлагъан документде акъылбалыкъ болмагъан къайсы къыралгъа баргъанын, ол анда къаллай бир заман турлугъун да жазаргъа жарайды. Бу кезиуде уа  сабий жаланда белгиленнген къыралгъа барыргъа эркинди. Анга жолда бир ненча къыралдан ётерге тюшсе, аланы тизмеси да кийириледи.

Акъылбалыкъ болмагъанны законлу келечиси ол Россейден тышына баргъанына ыразы болмагъанын билдирирге да эркинди.  Бу заманда уа сабийни Россейден тышына элтирге чек  тохташдырылады, аллай тыйгъыч жаланда заявленияны жазгъан адамгъа салынмайды.

Россейли законла бла бирге тыш къыралланы излемлери бла да шагъырей болургъа чакъырадыла чекчиле. Алада башха  жорукъла жюрюрге боллукъдула. Ол жаны бла ангылатыуну консул учрежденияда алыргъа онг барды.