Кеуню сыйы-учаи

Ахыр 15-20 жылда тойларыбызда  аслам жыр айтылады, жаш адамла, абаданла да аякъ бюгерге угъай демейдиле. Къобузчуладан, жырчыладан да къуру тюйюлбюз. Къысхасы,  тойларыбызда миллет энчилигибиз кёрюне башлагъанды.  Келинни баш ауун алгъанда уа, аны тёгерегине тепсеп, бетин алай бла ачыкъ этедиле.

Унутула баргъан иги тёрелерибиз къайта тебирегенине уа къууанмай къалай къалгъын. Тойлада боза ичиледи. Тап сюзюлген боза болса, жашы, къарты да аны излейдиле. Аллай бир тойда къызны жаны киеу нёгерлеге жарагъан  уча  этип, тёреде болуучуча аны тап да жасагъан эдиле. Къарындашындан туугъан къызны тоюна учаны хабазчы Хатукаланы Малик жарашдыргъанын билип, хар элде ара мюлкле болгъан кезиуде къойчу къошунда терк бола тургъан Малик  бла учаны хайырындан тойда тюбешдик. Маликни,  Хабазда ара мюлкде къойчу болуп тургъаны себепли,  мал тутуудан, этден къаллай ашарыкъла этилгенинден да хапары барды. Ол киеу, уча  къалай этилгенин айта, былай деди:

-Учаны биширсенг, эт сюекден айырылып,  тап болмайды. Чёплеу жауну жагъып, алай къыздыра барсанг а, тийишлисича  болады.  Бизни жаныбызда-Хабазда,  уча этиу тёре къалмагъанды. Алай бир-бир тойлада уча бош алай ариулукъгъа этилген сунуп, киеу нёгерле биргелерине алмай да кетиучюдюле.

Ушагъыбызны кезиуюнде аны бу хунерине башхаланы да юйретирге керегин чертдим.

-Бу иги тёребизни къайтарыргъа керекди. Тойгъа чакъырсала, жангы  къуралгъан юйюрге малны  кесимден ала келип, уча этерме, юйреннген этсинле ансы,-деди Хатука улу.