Чемпионла оюнну энчиликлерине юйретирикдиле

«Биз башхабыз, алай тенгбиз» регион проект жашауда бардырылып башлагъанды. Ол саулукъларына кёре чекленнген онглары болгъан сабийлени жамауат жашаугъа сингдирир, аланы спортха сейирлерин къозгъар мурат бла къуралгъанды. 

Анга 10-16 жыллары толгъан сабийле къатышадыла. Аны башламчысы Нальчик шахарны администрациясыны келечиси Астемир Ивазовду. Аны жашауда бардырыргъа грантны Шимал-Кавказ федерал округда жаш тёлю проектлени конкурсунда къытханды. Ахчаны РФ-ни Жаш тёлюню ишлери жаны бла агентство бёледи.

Бу жумушланы чеклеринде саулукъларына кёре чекленнген онглары болгъанлагъа спорт эришиуле къураллыкъдыла, ол санда  «Ладья» школда шахматладан турнир боллукъду. 17 сентябрьде анда спортну бу тюрлюсюнден дунияны, Россейни, Къабарты-Малкъарны, башха бийик даражалы эришиулени чемпионлары Чамал Гедгафов, Фатима Шахмурзова, Давид Темирканов эм Руслан Кудаев мастер-класс берликдиле.

 Проектге къатышыргъа хар кимни да эркинлиги барды, жыл санларына кёре. Соруулары болгъанла бу телефон номерге сёлеширге боллукъдула: 8-903-426-61-25.