Казбек Коков велосипедистчилеге жетишимле болдурургъа тежегенди

Юч кюнню ичинде Къабарты-Малкъарда велосипед спортдан  «Шимал Кавказны халкъларыны шуёхлукълары» деген биринчи кезиу эришиуле бардырылгъандыла. Ала республиканы 100-жыллыгъына жораланнгандыла. Велосипедистчилени араларында бу тёрели эришиуле 1993 жылдан бери бардырыладыла эм аны халкъла аралы даражасы барды.

КъМР-ни Башчысы Казбек Коков спорт байрамны къурагъанлагъа  Россейни велосипед спортуну федерациясыны таматасына - Юрий Кучерявыйге эм Россейни велосипед спортуну федерациясыны вице-президентине - Сергей Никитенкогъа ыразылыгъын айтханды.

 «Велосипед спортдан эришиуле Къабарты-Малкъарда башланнганлары бек иги шартды- айтхылыкъ спортчу СССР-ны велосипед спортдан сыйлы устасы Борис Шухов бизни жерлешибизди, ол 50 жыл мындан алгъа Мюнхенде Олимпиадада чемпион болгъанды. Бек ышанама бу эришиуле бизни республикада велосипед спортну айныууна себеплик этериклерине. «Шимал Кавказны халкъларыны шуёхлукълары» деген эришиулеге къатышхан битеу спортчулагъа жетишимле болдурурларын эм уллу хорламла тежейме», - деп айтылады республиканы оноучусуну алгъыш сёзюнде.

Велосипед спортдан эришиуле тёрт регионда 16 сентябрьге дери бардырыллыкъдыла. Ала Шимал Осетия-Алания, Ставрополь край, Къарачай-Черкес Республика эм Адыгея Республикада бошаллыкъдыла. Спортчулагъа бек аздан 910 километрни ётерге керекди. Финал эришиуле Майкопда бардырыллыкъдыла. Ары Россей Федерацияны битеу регионларындан 100 спортчу, Белоруссияны эм Казахстанны келечилери да къатышадыла. Битеу бирге 17 команда болады.

Спортчуланы араларында битеуроссей эм халкъла аралы эришиуледе хорлагъанла, ол санда 2022 жылда Россейни чемпиону  Петр Рикунов, Европаны эм дунияны чемпионатларында доммакъ майдалла алгъанла Мамыр Сташ бла  Александр Евтушенко, халкъла аралы эришиулени хорлагъан  Дмитрий Страхов эм 2016 жылда дунияны кубогун алгъан Константин Некрасов да барды, деп билдиредиле республиканы оноучусуну пресс-службасындан.

Бизни корр.