КъМР-де саулукъ сакълауну биринчи звеносу жангыртылынады

Озгъан жылда республикада саулукъ сакълауну биринчи звеносун жангыртыу бла байламлы уллу программа ишлеп башлагъанды. Жарашдырылгъан программагъа кёре, 2021-2025 жыллада Къабарты-Малкъарда битеу шахар поликлиникалагъа, район больницаланы поликлиника бёлюмлерине тынгылы ремонт этилликди. Андан сора да, жангы амбулаторияла, ол санда Элбрус элде участкалы больница ишленирикди эм Нальчикде сабий поликлиника тынгылы жангыртылынырыкъды.

Жарашдырылгъан планнга кёре, медицина биригиулени биринчи звеносуну ырысхы-техника базасын бир-бири ызындан алышындырадыла. Андан сора да, поликлиникаланы эм поликлиника бёлюмлени диагностика оборудование бла жалчытадыла, амбулаториялагъа санитар транспорт бериледи.

Республиканы медицина организацияларыны биринчи звеносун жангыртыу бла байламлы программа ишлеп башлагъанлы 137 тюрлю-тюрлю оборудование алыннганды, ол санда эндоскопия эм рентген комплексле, эм эл амбулаториялагъа Lada Granta автомашиналаны мурдорунда этилген 41 санитар транспорт.  

Быйыл Нальчикде эки поликлиника бёлюмге, Майскийде сабий поликлиника бёлюмге, Атажукинода эки амбулаториягъа эм Малкада амбулаториягъа тынгылы ремонт этилгенди.

Андан сора да, юсюбюздеги жылда Нальчикде юч поликлиникагъа, Терекде, Чегемде, Къашхатауда эм Залукокажеде  поликлиника бёлюмлеге тынгылы ремонт этип бошаргъа мурат барды.

2023 жылда Прохладныйде, Бахсанда эм Тырныаузда поликлиникалагъа ремонт этилип бошаллыкъды.  Бюгюнлюкге Нальчикде шахар поликлиниканы экинчи бёлюмюню ремонту этилгенди. Ол объект Россейни Саулукъ  сакълау министерствосуну биринчи звеносун кёргюзтюу бла эм иги сынауу деген тизмеге тюшгенди.

Нарткъалада районла аралы больницаны баш корпусуна тынгылы ремонт этиледи.  Аны 2023 жылны биринчи кварталында бошаргъа мурат барды, андан сора анда район поликлиника орнатыллыкъды. Нарткъалада жашагъанлагъа таплыкъгъа деп поликлиникагъа автобус жюрюрюкдю.   

Быйылгъы жылны аягъына Нальчикде сабий поликлиниканы жангыртыу бошаллыкъды. Шёндю поликлиниканы жанына 1520 квадрат метр  болгъан юч этажлы мекямны къошхандыла. Бюгюнлюкде поликлиника 1600 квадрат метр болады. Къурулуш бошалгъандан сора къошакъ этилген мекямда операция блок бла кюндюз тургъан жерле  къураллыкъдыла, дагъыда педиатрия бёлюм эм рентген, УЗИ, лучевой эм физиотерапиясы болгъан уллу диагностика бёлюм ачыллыкъды.  Андан сора анда амбулатория звенону реабилитациясы боллукъду. КъМР-ни Башчысыны буюрууу бла сабий поликлиникаланы жангыртыуларын келир жылдан тебиреп алгъаракъ этерге деген соруугъа къарала турады. Сёз Нальчикде  Калинина-Трошева орамда орналгъан поликлиника бёлюмню юсюнден барады. Анда адамлагъа къараргъа отоула жетишмегени ючюн тынгылы ишле бардырыллыкъдыла.

  Быйыл Аушигерде жангы амбулатория  хайырланыргъа  берилликди.Шёндю аллай амбулатория Куба элде ишлене турады, Элбрусда жангы участка больницаны къурулушу барады.  

 Жангы абулаторияланы къурулушларын бардырыу программагъа эски болгъан эм хайырланыргъа жарамагъан мекямла тюшгендиле. 2025 жылгъа ол программаны чеклеринде Октябрьское, Жемтала, Акъ-Суу, Кенже, Звездный, Тёбен Черек, Куба-Таба, Красносельское, Светловодское, Дейское элледе жангы врач амбулаторияла ишленирикдиле. Дагъыда Яникой, Кичмалка, Тёбен Чегем, Нартан, Шалушка, Герменчик, Урожайное, Кёнделен, Огъары Куркужин, Урван эм башха элледе амбулаториялагъа тынгылы ремонт этилликди.

 Медицинаны биринчи звеносуна жангыртыу программасына тюшмеген объектлени «Эллени комплексли халда айнытыу» деген программагъа къошар мурат барды. Жер-жерли администрацияланы  болушлукълары бла Бахсан, Черек, Терк эм башха  районлада жангы амбулаторияланы мекямларыны къурулушларыны заявкалары хазыр этиле турадыла, деп билдиргендиле КъМР-ни Саулукъ сакълау министерствосундан.

Бизни корр.