Борчну зорлап къайтарыуда бузукълукъланы тохтатыугъа бурулупду

Ахыр кезиуде коллекторланы законсуз ишлерине тарыгъыула кёбейгендиле. Борчну жыябыз деп, адамланы къоркъутууну, зорлукъ сынатыуну тохтатыр мурат бла РФ-ни Правительствосу закон хазырлагъанды, бу кюнледе аны проектин РФ-ни Къырал Думасында сюзерикдиле.

Документге тийишлиликде, банкланы, микрокредит организацияланы адамланы къолларындан болгъан борчну жыйыу ишлери сюд приставланы къарауларына бериледи. Ол жаны бла тюрлениуле «Инсанла тёлемей жыйылгъан борчну  къайтарыу иш толтурулгъанда адамланы законлу сейирлерин бла эркинликлерин къоруулауну юсюнден» эмда «Микрофинанс ишни эм микрофинанс организацияланы юсюнден» федерал законлагъа кийириледиле.

 - Законопроект кредит эм микрофинанс организацияланы ахчаларын къайтарыу ишни къалай къурагъанларын къырал контрольгъа  алыр эм аны кенгертир мурат бла хазырланнганды,-деп айтылады аны ангылатыу бёлюмюнде.

 Профессионал  коллектор организацияланы бла кредит эм микрофинанс учрежденияланы къырал тизмесин Сюд приставланы федерал службасы бардырлыкъды.  Анга керекли шартланы Россейни Банкы кёргюзтюрюкдю эмда реестр ведомствону сайтында басмаланырыкъды.

Энтта бир жангычылыкъ. Законнга «профессионал коллектор организация» эм   «автоматизацияланнган  интеллектуал агент» деген ангыламла кийириледиле.