Уллу кёллюлюкню хатасы

Республикада  аварияланы асламы жорукълагъа бузукълукъла этип, кеслерини жолларындан тайып, алларына келген машиналаны полосаларына чыкъгъанларыны хатасындан боладыла. Къыралавтоинспекторла бу бузукълукъну хатасы артыкъда уллу болгъанын эсгертедиле.

Бютюнда уа ол трассада къоркъуулуду. Элледен, шахарладан тышында  водительле   къызыу барыргъа ёчдюле. Къызынып келген машинала къагъышхан кезиуде адамла   ауур жарала аладыла. Жарсыугъа, быллай жол болумлада жорукъланы сакъламагъан водитель бла бирге бир тюрлю терсликлери болмагъанла да ачыйдыла.

Право низамны сакълаучулары бизге ангылатханларыча, РФ-ни Административ бузукълукъланы кодексини 12.15-чи статьясыны 4-чю кесегине тийишлиликде, жолда жюрюуню жорукъларына бузукълукъ этип, аллына келген транспортну жолуна чыкъгъан кезиуде тазир салынады – 5 минг сом. Неда водительни машинаны жюрютюрге эркинлиги 4-6 айгъа  сыйырылады. Бузукълукъну къайтарып этген бу энчи эркинликсиз бир жылгъа къаллыгъын билирге керекди.

Къыралавтоинспекторла жолда жюрюуге къатышханланы бир бирге хурмет этерге, ашыкъмазгъа чакъырадыла. Эркин этилген жерде аллыгъызгъа келген машинаны жолуна чыгъаргъа тюшсе, бютюнда сакъ болургъа тийишлиди. Уллу кёллюлюкню, кесинге асыры бек базыныулукъну багъасы адамны саулугъу, жашауу болгъанларын унутмагъыз.