Пенсиячыны алдап, 2,3 миллион сомун къолгъа этген хыйлачы тутулгъанды

Былтыр 8 октябрьде Урван районда ОМВД-гъа Нарткъаладан 85-жыллыкъ тиширыу аны 2 миллион 350 минг сомун урлагъанларына тарыгъып келгенди. 

Ол билдиргенича, аны телефонуна тиширыу, ызы бла уа эр киши сёлешгендиле. Биринчиси банкны келечиси, экинчиси уа «тамата следователь» болгъанларын айтхандыла.

Жалгъан финансист тиширыуну аты бла кредит алыуну юсюнден юч тилек келгенин билдиргенди. Пенсиячы аланы жазмагъан эсе, ахчасын тас этмез ючюн, аны къоркъуусуз счётха ашырыргъа керекди деп алдагъанды. Ызы бла уа ахчаны аны жашагъан жерине курьер келтирликди деп ышандыргъанды.

Ётюрюкню кертиге бютюнда ушатыр ючюн а жалгъан следователь банк операцияны юсюнден бир адамгъа да билдирирге жарамайды деп къоркъутханды. Дагъыда банкны къуллукъчусуну айтханларын чырмаусуз толтурургъа керекди, деп да къошханды.

Ма алай бла пенсиячы ахчасын хыйлачыла айтхан счётха ашыргъанды. Алай не кёп сакълагъан эсе да, курьер келмегенди. Экинчи кюн ол банкны къуллукъчусуна сёлешип кёргенди. Алай аны телефону ёчюлюп эди.

Тийишли тинтиуле бардырып, право низамны сакълаучула «тамата следовательни» тохташдыргъандыла. Ол Татарстандан 26-жыллыкъ жаш адамды. Бу кюнледе ишеклини Къазанда тутуп, Къабарты-Малкъаргъа келтиргендиле. Ол этген аманлыгъына женгдиргенди.

Ишеклиге РФ-ни УК-сыны 159-чу статьясыны 4-чю кесегине кёре терслеу материалла ачылгъандыла.