«Ата-анала, жамауат да тири къатышханлары къууандырады»

«Единая Россия» партияны бла РФ-ни Жарыкъландырыу министерствосуну программасыны чеклеринде быйыл 1 сентябрьде къыралны регионларында тынгылы жангыртыудан сора мингден аслам школ сабийлеге эшиклерин ачхандыла. Битеу да бирге программагъа 75 регион къошулгъанды.

 Жылны ичинде 1661 мекям тапландырылыргъа керекди. «Шёндюгю билим бериу эм илму» партия программаны жашауда бардырыугъа жууаплы, РФ-ни Къырал Думасыны жарыкъландырыу жаны бла комитетини башчысы Ольга Казакованы айтханына кёре, бу жумушла РФ-ни Президентини буйрукъларына кёре бардырыладыла.

- Жангыртылгъан мекямлада терезелери, башлары алышынып къалмагъанды. Школлада сабийлеге билим алыргъа жангы амалла къуралгъандыла, ол санда спорт, театр бла кюреширча жерле ачылгъандыла, дерслен тышында иш тамамланырча отоула да къуралгъандыла. Билим бериу учрежденияла заманнга  келишгенлери, жаш адамланы излемлерин жалчытханлары бютюнда магъаналыды,-дегенди ол.

Регионлада программа жашауда къалай бардырылгъанын партияны жамауат штаблары тинтгенлей турадыла. Хар объектде да депутатла болуп, жангыртыу къалай баргъанын дайым да сюзгендиле. Жылны ахырына дери тапландырылыргъа керекли объектлени болумларына уа энчи эс бурулады. Аланы окъуучулары болжаллы халда башха билим бериу учреждениялагъа кёчюрюлгендиле.

Регионланы кёбюсюнде программа ахырына жетдирилгенди. Сёз ючюн, Къарачай-Черкесде анга 23 школ кийирилген эди да, аладан 18-си битдирилгендиле, къалгъанларын келир жыл берликдиле хайырланыргъа.

Келир жыл  къыралда энтта 3 минг школда тынгылы жангыртыу жумушла бардырыллыкъдыла. Аланы асламы элледе болгъанларын айтырчады.

Эсигизге салайыкъ, келир беш жылны ичинде Россейде школланы тапландырыргъа кереклисини юсюнден  Владимир Путин «Единая Россияны» съездинде айтханды. Жангыртылыргъа тийиишли мекямланы тизмесинде  7,3 минг объект барды. Бу жумушлагъа федерал бюджетден ахча бёлюнеди. Ол санда быйыл 66,5 миллиард сом берилгенди.

Битеу да бирге уа «Единая Россияны» халкъ программасын жашауда бардырыугъа 298 миллиард сом салыннганды. Андан 150 миллиард жангы мекямланы ишлетиуге, 34,6 миллиард арбазланы бла адам аслам жыйылгъан жерлени жангыртыугъа, 2,4 миллиард спорт майданла къураргъа, 14,6 миллиард маданият юйлени тапландырыугъа, 5,3 миллиард а почтаны бёлюмлерин игилендириуге берилликди.

РФ-ни Къырал Думасында Къабарты-Малкъардан  депутаты Виктория Родинаны айтханына кёре, партияны халкъ программасыны болушлугъу бла республикада 10 школ ишлетилликди, 29 мекямда уа тынгылы жангыртыу ишле бардырыллыкъдыла. Быйылны ахырына дери  юч учрежденияны   хайырланыргъа берирге тийишлиди. Алада 1785 школчугъа жер барды. Энтта 7 школ (алада уа 4539 жер боллукъду) келир жылны ахырында битдирилликдиле.  

Тынгылы жангыртыуну юсюнден айтханда уа, мекямлада инженер ызланы, терезелени, эшиклени алышыргъа, ичлерин жангыдан сюртюрге, башха керекли ишлени толтурургъа белгиленеди.

- Бу жумушла къалай бардырылгъанларына республиканы власть органларыны келечилери бла бирге КъМР-ни Башчысы Казбек Коков кеси да къарагъанлай турады. Бу ишге сабийлени ата-аналары, жамауат да тири къатышханлары къууандырады. Къурулуш болжалла, техника излемле сакъланып толтуруладыла,-дегенди депутат «Единая Россия» партияны КъМР-де регион бёлюмюню пресс-службасына.