Жангыртылгъан мектепле эшиклерин кередиле

Къабарты-Малкъарны къыраллыгъыны  бла Билимни кюнлерини байрамы Чегем районну  билим бериу организацияларында  жарыкъ  линейкаладан  башланнганды. Алай бла мингле бла сабийле биринчи кере билим бериу учреждениялагъа баргъандыла.

Ол кюн КъМР-ни Парламентинде аграр, табийгъат байлыкъланы хайырланыу, экология  эм тёгерекдеги къудуретни сакълау жаны бла  комитетни таматасы Артур Текушев, Чегем муниципал районну  администрациясыны башчысы Юра Борсов,  Жарыкъландырыу эм илму минстерствону, билим бериу  управленияны  келечилери  Тёбен Чегемде жангыртылагъан школну ачылыууна къатышхандыла.
Школгъа 45 жылны ичинде биринчи кере тынглы ремонт этилгенди, ол санда инфраструктурасы да жангыртылгъанды. Игилендириу ишле  регион программагъа кёре бардырылгъандыла. Энди  дерсле жарыкъ  отоулада ётерча эм окъуучуланы да   къоркъуусузлукълары  жалчытылынырча мадар этилгенди. Саулай алып айтханда,  мектеп жангы излемлеге келишеди эм не тюрлю жаны бла да сабийле  билимлерин ёсдюрюрча онгла къуралгъандыла.

- Бизге дайым эс бергенлей эм болушлукъ тапдыргъанлай тургъаны ючюн  республиканы Башчысына Казбек Коковха ыразылыгъымы билдирирге сюеме.  Бюгюнлюкде регионда иги жанына  уллу тюрлениулени кёребиз, ол санда билим бериу бёлюмде да. Ол стратегия жаны бла къыйматлы болгъаны да бямды.
 Тёбен Чегемни школчуларын да  жангы окъуу жыл бла  алгъышлай окъууларында ахшы жетишимле болдурурларын тежейме, - дегенди Юра Борсов.

Бызынгыда да жангы окъуу жылны аллында къошакъ билим берген  “Точка роста” ара ачылгъанды. Эки кабинетге тынгылы ремонт этип, жангы мебель салгъандыла эм   цифралы оборудование бла да жалчытхандыла.  Мында  къошакъ халда физика, биология эм  химия  придметледен  теренирек окъутурукъдула.

План бла быйыл республикада 37 чакълы «Точка роста» ара ачыллыкъды.   Аллай амал узакъ элледе жашагъанла шахарлада тенглеринден артха къалмай жангы излемлеге кёре билим алырча себеплик этерикди. 

Аны бла бирге быйыл 4500 сабийге жети мектепни къурулушу башланырыкъды, ол санда Нальчикле 1500 адамгъа. Жылны ахырына уа 1785 окъучугъа, Куба  элде  Прохладна  бла Нарткъала шахарлада школла битерикдиле. 

Саулай алып айтханда, 2025 жылгъа 11500 окъуучугъа 18 школ сюелтилинирикди эм 176-на да тынгылы ремонт этилликди.