Гюл къысымла, алгъышла, назмула да

Биринчи сентябрьде республикабызны школларына онбеш минг чакълы сабий биринчи класслагъа келгендиле. Нальчикни жетинчи номерли мектебине уа – 150 жашчыкъ бла къызчыкъ.

Саулай да ала беш классха юлешиннгендиле. Сабийлени жазаргъа, окъургъа юйретирик устазланы арасында уа Кульчаланы Зарема Магомедовна бла Атмурзаланы Лена Алексеевна да барадыла.

Байрам линейка РФ-ни эмда КъМР-ни къырал байракъларын къууанчлы халда кётюрюуден башланнганды. Бу жумушну тамамларгъа уа педагог коллектив школчуланы битеуроссей олимпиадаларыны физкультурадан призёру,  онунчу классны окъуучусу Дисана Апикованы  тийишли кёргенди.

Биринчи классха келгенчиклени, ата-аналаны, устазланы да жангы окъуу жыл бла, бирси байрамла бла да алгъышларгъа келген хурметли къонакъла уа КъМР-ни жарыкъландырыу эмда илму министрини къуллугъун толтургъан Анзор Езауов, Нальчик шахар округуну администрациясыны билим бериу департаментини келечилери Улбашланы Ахмат бла Инна Хачетлова да болгъандыла.

Биринчи къонгуроуну байрам линейкасына жыйылгъанланы къонакъбай школну директору Заур Харзинов алгъышлагъанды. Ол билимни жолуна энди атлам эте тургъанчыкъланы окъуулу, билимли да болуп ёсерлерин сюйгенин айта, бу мектепде аланы юйретирча сынамлы педагогла болгъанларын да чертгенди.

Ата-анала бла биригиулюкде ишлей, ала жетишимли да болгъанларын белгилегенди. Быйыл школгъа биринчи кере баргъанчыкъланы эслеринде ол бютюнда бек сакъланырыгъы уа, республикада билим бериуню жюзжыллыгъы эмда регионубузну аллай юбилейи бла байламлы болгъанындан сора да, бу жол бери къонакъгъа жарыкъландырыу эмда илму министрни къуллугъун толтургъан келгени бла да байламлы болгъанын да.

Анзор Клишбиевич да ёсюп келген тёлю – ол республиканы, къыралны да тамблагъы кюню болгъанын черте, аланы билимни жолунда устазла, ата-анала да биригип элтирге керек болгъанларын айтханды. «Бюгюн эм ариу кюнледен эмда байрамладан бириди. Ол сизни жашауугъузда эм огъурлу кюн болуп, сизни сейир школ жашаугъа алай келтирсин», - дегенди. Ата-аналагъа, устазлагъа да тёзюм, саулукъ-эсенлик да тежегенди.

Ызы бла уа ол бюгюн школгъа келирге бошдан сайламагъанын айта, анда ишлеп келгенли энди 65 жыл толгъан педагог да болгъанын билдирип, ариу алгъышлары бла Любовь Артёмовна Беляеваны Министерствону Сыйлы грамотасы, гюлле бла да саугъалагъанды.

Биринчи устазланы атындан а Зарема Магомедовна сёлешгенди. Ол, ата-аналаны сабийлерин биринчи кере школгъа келгенлери бла алгъышлай, ала къолларындан келгенича ёсдюргенлерине болушлукъ этерлерин, сюймекликлерин да аладан къызгъанмазларын тежегенди. Къайсы сабийге да эм алгъа юйюр таянчакъ болгъанын, аланы окъутууда, юйретиуде да педагогла, ата-анала да биригирге тийишлиликлерин къатлагъанды.

Алгъышлауладан сора уа гитчечиклени байрам линейкагъа чакъыргъандыла. Ала уа школ жашауну юсюнден юйреннген назмуларын окъугъандыла. Трамланы Самира бла Аделина Балова да жырларын эшитдиргендиле.

Ызы бла жашчыкълагъа бла къызчыкълагъа биринчи къонгуроу къагъылгъанды. Аны уа онбиринчи классны окъуучусу Эльдар Вороков бла энди мектепге жюрюп тебиреген Амелина Маршенкулова зынгырдатхандыла.

Андан сора уа сабийле, кеслерини биринчи дерслерине бара, школну мекямына киргендиле. Эсгерте кетсек, жангы окъуу жылда хар баш кюнде биринчи дерс «Разговоры о важном» деген программагъа тийишлиликде бардырыллыкъды. Бу башламчылыкъ кесини магъанасын кёргюзтюр, хайырын да ачыкълар деген умутда устазла, окъуучула да жангы жетишимлеге жетерле деп, биз да ышанабыз. Саулай да алып айтханда, быйыл республикада мектепге 120 мингден аслам сабий жюрюрюкдю.