Донбассчылагъа - россейли дипломла

Кёп болмай  Луганск Халкъ Республиканы къырал педагогика  университетини выпускниклерине къууанчлы халда КъМКъУ-ну бла смоленскни къырал университетини дипломлары берилгендиле. 
Ол кезиуде сёлеше, ЛГПУ-ну ректору Жанна Марфина эки вузну  ректорлары  Юрий Альтудовха  бла Михаил Артёменковха  халкъла аралы байламлыкъны къураргъа, ол санда «эки  диплом» программаны бардырыргъа  себеплик этгенлери ючюн жюрек  ыразылыгъын билдиргенди.   Аны бла бирге билим бериу, илму-излем, жаш тёлю политика эм башха къыйматлы программалагъа да тири къатышханлары ючюн ыспас этгенди. 
- Сизге бюгюн энчи кюндю - диплом къоллу болгъаныгъыз бла жетишимлени жолу ачылады.  Ала Россей Федерацияныкъыла болгъанлары уа тамблагъы кюннге бютюн бек ышандырады. Быллай магъаналы иш Къабарты-Малкъарны бла Смоленск къырал университетни  байламлыкъларыны хайырындан  къуралгъанды.  Мындан арысында биз бирге кёп иги проектни бардырыргъа таукелбиз,- дегенди Жанна Викторовна. 
Быйылны выпускниклери,  «партнёр» вузланы  программаларына кёре билим алгъанларындан сора да, окъууда кеслерин айырмалы кёргюзталгъандыла. Сёз ючюн, сегизеулен къызыл дипломлагъа тийишли болгъанлары ал урумда ахшы атламды,  мындан арысында да жангы жетишимлеге таукеллендирген шартды. 

Поделиться: