«Единая Россия» халкъ программагъа тюзетиуле хазырлагъанды

«Единая Россия» партияны халкъ программасына  80 жангычылыкъ хазырланнганды. Ала билим бериу, саулукъ сакълау, къурулуш, ЖКХ  эмда Донбассны республикаларына эмда азатланнган тийрелеге болушлукъ этиу бла байламлыдыла.  Аланы «Единая Россияны» халкъ программасына тюзетиуле хазырлау жаны бла ишчи къауумну жыйылыуунда сюзгендиле.

-Донбассха болушуу документни энчи бёлюмю боллукъду, - дегенди партияны Генеральный советини секретары Андрей Турчак, жыйылыуну башлай. -Сёз социал эмда гуманитар жаны бла себеплик этиуню юсюнден барады. Аллай болушлукъну уа  «Единая Россия» энчи аскер операция башланнганлы бери да тапдырады.

Ол айтханнга кёре, халкъ программа  къабыл кёрюлгенли 2 мингден артыкъ  социал объект ишленнгенди эмда жангыртылгъанды. Халкъ программаны толтуруу бла байламлы 100-ден артыкъ марда-право актла, 30-дан аслам федерал закон да къабыл кёрюлгендиле.

 Партияны ара исполкомуну башчысы Александр Сидякин а халкъ программагъа кёре белгиленнген ишле къалай баргъанларына кёз-къулакъ болуп турур ючюн, «Партиялы десант» деген проект къуралгъанын эсге салгъанды. Анга кёре 4 мингден аслам объект тинтилгенди, жамауат штаблагъа уа 20 минг адам киргенди – депутатла эмда жамауатчыла.

Билим бериу жаны бла  халкъ программагъа кирлик башламчылыкъла бла уа Къырал Думаны жарыкъландырыу жаны бла комитетини таматасы Ольга Казакова шагъырей этгенди. Аны оюмуна кёре, документде колледжлеге бла техникумлагъа тынгылы ремонт этиуню программасын кийирирге керекди.   Халкъ программагъа ЛДНР-ни педагоглары бла ишлеуню эмда Донбассны орус тилде литература бла жалчытыуну да къошууну ол дурус кёргенди.

-550 минг китап жыйылгъанды, 170 минги азатланнган тийрелеге жетдирилгенди, алай педагогла орус тилде китапла азлыкъ этгенлерин дайым айтып турадыла,- деп къошханды Ольга Казакова.

Халкъ программагъа дагъыда Россейге ЛДНР-ден келген сабийлени окъутууну къурау да кийирилликди. Дагъыда бир жангылыкъ -  ДНР-ни бла ЛНР-ни илму эм билим бериу организацияларына методика эмда инфраструктура болушлукъ этиудю.

Саулукъ сакълау бёлюмге да жангы болумла кийирилликдиле. Ала Донбассха медицина болушлукъ бериу эмда тыш къыраллы дарманланы алышдырыу бла байламлыдыла.

Социал башламчылыкълагъа кёре уа  жаш юйюрлени жашау журтла бла жалчытыуну программасында жыл саннга чек салыуну кетерирге белгиленеди. Дагъыда регионлада социал учреждениялада юйюрню багъаларча болумла къураргъа, инвалидлеге гитче социал эмда урунуу арала ачаргъа кереклиси айтылгъанды.

Андан сора да, «Единая Россия» ЖКХ бла байламлы болумну игилендириуню программасына бюджетден ахча бёлюнюрюне къайгъырлыкъды эмда аны халкъ программагъа къошарыкъды.  Анга  дагъыда  кёп фатарлы юйледе лифтлени алышындырыуну, халкъ республикалада бла азатланнган тийреледе инфраструктураны аягъы юсюне салыуну къошаргъа белгиленеди.

КъМР-ни Парламентинде  «Единая Россияны» фракциясыны таматасы, Бюджет, налогла эмда финансла рынок жаны бла комитетни председатели Михаил Афашагов, кесини оюмун айта, РФ-ни Президентини башламчылыгъы бла  единоросланы программалы документлерине жамауатха магъаналы социал программала киргенлерин эсге салгъанды. Аланы араларында юйюрлеге социал болушлукъ этиу, жаш тёлюню иш бла жалчытыу, эл школланы жангыртыу, саулукъ сакълауну биринчи болушлукъ берген бёлюмюн айнытыу, инфраструктураны кенгертиу, адамланы оюла тургъан юйледен кёчюрюу дегенча жумушла бардыла.

 «Халкъ программаны» хайырындан 2022 жылгъа федерал бюджетни юсюнден законнга бизни регионнга да уллу магъананы тутхан социал проектле кийирилгендиле. Ала уа окъуу жерлени кёбейтиу, онкология диспансерни къурулушун ахырына жетдириу, шахар поликлиниканы, Жаш тёлюню чыгъармачылыгъыны къаласын ишлеу, канализация эмда сууну тазалаучу ызланы жангыртыу, Нальчикде жангы микрорайонланы инфраструктура бла жалчытыу бла байламлыдыла», - дегенди Афашагов.