Бузукълукъла ачыкъланнгандыла

Эркинликсиз школланы аш-суу бла жалчытхандыла

Къабарты-Малкъарда УФСБ-ны  бла МВД –ны Зольск районда  следствие бёлюмюню келечилери  беш жылны  ичинде школну аш-суу бла эркинликсиз жалчытхан   экеуленни тутхандыла.  

Следствие билдиргенича,  ала налогла  органлада энчи предпринимательлеча   регистрацияны ётмегендиле.  Ол себепден  закон бла бу тюрлю иш бла кюреширге эркинликлери болмагъанды. Анга да къарамай, ала  2015-2020 жыллада жалгъан фирмаланы хайыры бла жыйырмадан аслам школну продуктла  бла жалчытып тургъандыла. Алай бла  кеслерине сегиз миллион   сомдан аслам  файда тюшюргендиле.

Жангы хыйлалыкъла

Россейни  МВД-сыны  Черек районда бёлюмюне    мында жашагъан тиширыу келип анга  биреулен телефон бла сёлешип, банкны келечисиме деп, картасындан ахчасын алдап  алгъанына тарыкъгъанды.   Ушакъны кезиуюнде эркегырыу, кесине ышандырып, СМС бла келген кодну  анга айтырын  тилегенди. Алай бла тиширыу,   кеси да билмей, счётунда болгъан 77 016 сомну белгисиз адамгъа кёчюргенди.

Ачыкъланнган шартлагъа кёре,  хыйлачылыкъ этгеннге  уголовный иш ачылгъанды.

Эсге сала айтсакъ, банкны атындан  телефон бла сёлешген бла ушакъ этерге керекмейди. Финанс учрежденияны келечиси  телефон бла бир тюрлю  операция  бардырыргъа   чакъырлыкъ тюйюлдю.  Ишекли болгъан а банкны бёлюмюне барып, специалистден кеси сураргъа керекди.

Жалгъан ёкюл  

Кёп болмай Прохладнада жашагъан 61-жыллыкъ эркегырыу,  полициягъа келип, беш жылны ичинде къоншусу  бла жер юлюшню бёлалмагъанларын,   алагъаболушургъа айтхан  ёкюлге ахча тёлеп тургъанын да билдиргенди.  Болсада ёкюл  бир тюрлю зат бла болушалмагъанды, былтыр а связгъа чыкъмай, думп болуп кетгенди. Саулай алып айтханда, аманлыкъчы 1,6 миллион сом къоллу болгъанды.

Оператив-излеу ишлени кезиуюнде уголовный розыскны келечилери хыйлачыны атын тохташдыргъандыла. Ол алгъын да  сюдлюк бола тургъан 25 –жыллыкъ нальчикчиди.   Эм сейири уа ол  ёкюл болуп бир кюн ишлемегенди, бу жаны бла бир тюрлю билими эм сынамы да жокъду.     

Алгъаракълада ол башха аманлыкъ иш ючюн тутмакъгъа олтургъаны себепли, къысха заманда  файдалы клиентинден айырылыргъа тюшгенди.  Уголовный кодексни 159-чу статьсыны 4-чю кесегине кёре, анга энтта да бир   иш ачылгъанды.  

Алдагъаны башына жарамагъанды

Кёп болмай Россейни  МВД-сыны Элбрус районда бёлюмюне Тырныауузда жашагъан 26-жыллыкъ жаш келип,  быйыл  18 июльда  анга банкны къоркъуусузлукъ жаны бла бёлюмюню келесича биреулен сёлешип алдагъанын билдиргенди.

Следствие ачыкълагъаннга кёре, жалгъан банкир, жаш адамгъа сёлешип, белгисизледен къоркъуу чыкъгъаны ючюн  банкда счётун,  ол санда кредит алыргъа завкасын да,   жабаргъа кереклисин эсгертгенди. Ызы бла тырныауузчуну аты бла   304 840 сомну кредитге  алгъанды. 

Оператив-излеу ишлени кезиуюнде полициячыла аманлыкъчыны тапхандыла. Ол Къазан шахарда жашагъан 23-жыллыкъ жаш болуп чыкъгъанды.   Алай бла 27 августда ол Къабарты-Малкъаргъа тапдырылгъанды.

Ачыкъланнган шартла бла байламлы  Татарстанны келечисине РФ-ни Уголовный кодексини 158-чи статьясыны 3-чю кесегини «г» пунктуна кёре (Банк картадан урлагъанына) уголовный иш ачылгъанды.

Окъуучулагъа къайгъыра

Жангы окъуу жылны аллында школ автобусланы техника  болумларын тинтир мурат бла  къырал автоинспекторла Лескен районну  билим бериу управлениясыны келечиси  Юрий Богус бла бирге  рейд бардыргъандыла.

кезиуюнде транспортну тормозларына,  къоркъуусузлукъну жалчытхан бауларына, чархларына,приборларына, тохографлары эм техасмотрлары болгъанларына эм мардалагъа келиширча  башха шартларына да эс бургъандыла.  Сабийлени ташыгъан марда-право жорукъланы юслеринден  билдиргендиле эм аланы бузгъанла жууапха тартыллыкъларын  да  эсгертгендиле.

Къырал инспекторла айтханнга кёре,  школ автобусланы сынамлы водительле жюрютюрге керекдиле эм техникаларында да бир тюрлю сылтау табылмазгъа  тийишлиди.

Къырал автоинспекциядан билдиргенлерича,  жангы окъуу жыл башланнганлай,  кюн сайын улоуланы болумларына контроль этилликди.

Бизни корр.
Поделиться: