Ахчасыз, эркинликсиз да къалмаз ючюн

РФ-ни Пенсия фондуну Къабарты-Малкъарда бёлюмюнден билдиргенлерича, арт заманда тюрлю-тюрлю адамла бла организацияла аналыкъ капиталны иелерине аны ахча  халда алыргъа неда энчи хакъгъа анга документлени хазырларгъа «болушханлары» бла байламлы болумла аслам чыгъа башлагъандыла. Аманлыкъчыла аны бла да чекленмейдиле. Аланы телефон бла сёлешип республиканы къалайына да консультация алыр ючюн чакъырыргъа боллукъду.

Фонд жамауатха энтта бир кере эсгертирге излейди – аналыкъ капиталны аллай халда алыу уллу уголовный бузукълукъду, бу жаны бла ишле криминал бла байламлыдыла. Быллай келишимге къол сала, сиз, закон бла берилген ахчадан къуру къалгъандан сора да, уголовный законодательствогъа бузукълукъ этгеннге саналыргъа боллукъсуз. Законнга тийишлиликде, аны, жашау-турмуш болумланы игилендириуге, сабийлени окъутуугъа эм сакъат баланы реабилитациясына, ананы пенсиясына къоратыргъа жарайды.

Пенсия фондну ишчилери заявленияланы жер-жерли къайсы бёлюмде да аладыла, ол санда электрон халда да, консультацияла бередиле. Ала башда сагъынылгъан бузукълукъла этилгенин ачыкъласала, аны юсюнден олсагъатлай право сакълаучу органлагъа билдирирге борчлудула.